បន្ទាយមានជ័យ៖ យ៉ាងណាស់ មនុស្ស៤នាក់ត្រូវបានគេរាយការណ៍ថាបានស្លាប់បាត់បង់ជីវិតនៅក្នុងហេតុការណ៍លង់ទឹកក្នុងថ្ងៃតែមួយ លើទីកន្លែងផ្សេងគ្នានាខេត្តបន្ទាយមានជ័យ ដែលហេតុការណ៍បានកើតឡើងកាលពីថ្ងៃទី២១ខែមិថុនា ឆ្នាំ២០២២ ។
យោងតាមសម្តីរបស់នគរបាលជំនាញស្រុកស្វាយចេកបានឱ្យដឹងនៅចន្លោះពីម៉ោង១០ទៅម៉ោង១១និង៣០នាទីព្រឹក មានក្មេងប្រុសម្នាក់ឈ្មោះ ថែវ វ៉ាន់ថង (ហៅម៉ៅ)អាយុ០៦ ឆ្នាំ បានលង់ទឹកស្រះជីកក្នុងស្រែស្លាប់នៅចំងាយប្រហែល ២,០០០ ម៉ែត្រ ខាងជើងភូមិតាវ៉ឹក ឃុំទ្រាស ស្រុកស្វាយចេក ខណ:ពេលទៅតាមឪពុកម្ដាយទៅភ្ជួរស្រែ ។
នគរបាលស្រុកមង្គលបូរី បានឱ្យដឹងថា៖នៅថ្ងៃទី២១ខែមិថុនា ឆ្នាំ២០២២ វេលាម៉ោង០៣និង១៥ នាទីល្ងាច មានក្មេងប្រុសម្នាក់ក្នុងចំណោមក្មេងប្រុស២នាក់ឈ្មោះញ៉ា ផានិត អាយុ៧ ឆ្នាំ បានលង់ទឹកប្រឡាយស្លាប់ខណៈដែលពួកគេនាំគ្នាលេងទឹកប្រឡាយចំងាយ១,០០០ម៉ែត្រខាងត្បូងភូមិស្រណាល ឃុំសំបួរ ស្រុកមង្គលបូរី ក្មេងប្រុសរងគ្រោះរស់នៅជាមួយជីដូនគ្រាដែលឪពុកម្តាយចំណាកស្រុកធ្វើការនៅប្រទេសថៃ។
នគរបាលជំនាញស្រុកថ្មពួកបាននិយាយថា៖មានជនរងគ្រោះម្នាក់ឈ្មោះ ពិន សាវឿត ភេទប្រុស អាយុ ៥៨ឆ្នាំ បានស្លាប់ដោយសារលង់ទឹក នៅថ្ងៃទី២១ ខែមិថុនា ឆ្នាំ២០២២ ចន្លោះពីម៉ោង០៤ ដល់ម៉ោង ០៨និង១៥នាទីយប់ សង្ស័យស្រវឹងស្រាហើយចុះងូតទឹកស្រះ ខាងជើងភូមិទ្រាស ចម្ងាយប្រមាណជា២០ម៉ែត្រ បណ្តាលឱ្យលង់ស្លាប់។
រីឯនគរបាលក្រុងសិរីសោភ័ណក៏បានឱ្យដឹងដូចគ្នាដែរថានៅវេលាម៉ោង០១និង៣០នាទី ថ្ងៃជាមួយគ្នាមានក្មេងស្រីម្នាក់ឈ្មោះ រិទ្ធ ឡេឌី អាយុ៦ឆ្នាំ បានលង់ទឹកស្រះស្លាប់នៅចំណុច វាលស្រែចម្ងាយ ៣០០ម៉ែត្រ ខាងលិច ភូមិតាម៉ា សង្កាត់ម្កាក់ ក្រុងសិរីសោភ័ណ ខេត្ត បន្ទាយមានជ័យ។ជុំវិញហេតុការណ៍ទាំង៤ករណីខាងលើ នគរបាលជំនាញបានអះអាងលើការធ្វើកោសល្យបច្ច័យថា អ្នកស្លាប់គឺពិតជាបានលង់ទឹក មិនមានពាក់ពន្ធ័និងអំពើឃាតកម្មឡើយ បច្ចុប្បន្នសពត្រូវបានក្រុមគ្រួសារធ្វើបុណ្យតាមប្រពៃណីនៅតាមគេហដ្ឋានរៀងៗខ្លួន។
