នាយកផ្នែកកីឡា Bayern Munich លោក Hasan Salihamidzic បានសម្ដែងក្ដីរំពឹងថាខ្សែប្រយុទ្ធ Robert Lewandowski នឹងត្រលប់មកហ្វឹកហាត់វិញនៅខែក្រោយ ដោយលោកមិនខ្វាយខ្វល់រឿងក្លិប Barcelona នឹងដាក់សំណើសុំទិញគេឬអត់ទេ។
នាពេលកន្លងទៅRobert Lewandowski ធ្លាប់បញ្ជាក់ថារូបគេចង់ចាកចេញពី Bayern ដោយចាប់អារម្មណ៍ផ្លាស់ទៅកាន់ Barca ហើយ Barca ក៏ចាប់អារម្មណ៍ចង់បានដែរតែយ៉ាងណា Bayern ហាក់ដូចជាមិនចង់ឲ្យចេញដោយបញ្ចុះបញ្ចូលសុំឲ្យគេនៅរហូតមក។
លោក Salihamidzic បាននិយាយទៅកាន់សារព័ត៌មាន Bildថា៖«ជំហររបស់យើងគឺច្បាស់លាស់ណាស់គឺថា Robert គេនៅមានកុងត្រាជាមួយយើងរហូតដល់រដូវកាលខែក្ដៅឆ្នាំ២០២៣ឯណោះ»។
លោកបានបន្តថា៖«រឿង Barcelona ដាក់សំណើថ្មីសុំទិញគេ ខ្ញុំមិនខ្វល់រឿងហ្នឹងទេ។ ខ្ញុំរំពឹងថានឹងឃើញ Robert ត្រលប់មកហ្វឹកហាត់វិញនៅថ្ងៃទី១២ ខែកក្កដា ឆ្នាំ២០២២ខាងមុខប៉ុណ្ណោះ»៕
