ផ្លែម្នាស់ទឹកឃ្មុំនៅខេត្តស្ទឹងត្រែង មានការចាប់អារម្មណ៍ពីអតិថិជន ព្រោះវាមានរសជាតិផ្អែមឆ្ងាញ់ដូចទឹកឃ្មុំនៅរដូវប្រាំង តែនៅឆ្នាំ២០២២នេះ កសិករដាំបានផ្លែតូចៗ ដោយសារដំណាំប្រភេទនេះ រងផលប៉ះពាល់ពីអាកាសធាតុប្រែប្រួល មានទឹកភ្លៀងច្រើននៅដើមរដូវ។ ក្នុងរដូវប្រមូលផលផ្លែម្នាស់ទឹកឃ្មុំ នៅថ្ងៃទី២៦ ខែមិថុនា ឆ្នាំ២០២២ លោក ខិន សុខា កសិករដាំម្នាស់នៅចំណុចអួរច្រឡង់ ឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង បានបញ្ជាក់ថា ឆ្នាំនេះផលម្នាស់មានផ្លែតូចៗច្រើនជាងឆ្នាំកន្លងមក ដោយសារតែកត្តាអាកាសធាតុប្រែប្រួល មានភ្លៀងច្រើនធ្វើឱ្យដីជាំទឹក ពិបាកក្នុងការថែទាំ ។ លោកបន្តថា បញ្ហាប្រឈមនេះ បានធ្វើឱ្យម្នាស់មានផ្លែតូច លក់បានតម្លៃត្រឹមតែ ១.៥០០ ទៅ ២.០០០រៀល ក្នុងមួយគីឡូក្រាម ចំណែកផ្លែធំល្មម លក់បានតែ ២.៥០០ ទៅ ៣.០០០រៀល តែប៉ុណ្ណោះ ហើយពិបាករកទីផ្សារទៀត និងផ្លែមួយចំនួនត្រូវបង្ខំចិត្តលក់ឱ្យអ្នកធ្វើជីកំប៉ុស្តិ៍ ក្នុងមួយផ្លែ១.០០០រៀល។
លោកស្រី ឡា ម៉ាលី អាជីវករលក់ផ្លែឈើ នៅចំណុចអូរពងមាន់ បានអះអាងថា ម្នាស់ទឹកឃ្មុំមានតម្លៃខ្ពស់ នៅដើមរដូវចាប់ពីខែឧសភា ដល់ដើមខែមិថុនា ក្នុងតម្លៃ ពី៤.០០០ ទៅ៥.០០០រៀល ក្នុងមួយគីឡូក្រាម ចំណែកផ្លែធំៗ លក់ទាំងមូលមួយផ្លែបាន ពី១៥.០០០ ទៅ២០.០០០រៀល មានទម្ងន់ចាប់ពីជាង ៣គីឡូក្រាមឡើងទៅ ។ លោកស្រីថា ប៉ុន្មានឆ្នាំចុងក្រោយនេះ វត្តមានភ្ញៀវទេសចរ ពុំសូវមានធ្វើដំណើរឆ្លងកាត់តាមតំបន់នេះទេ ដោយសារតែប្រទេសយើង រងផលប៉ះពាល់ពីជំងឺកូវីដ-១៩ ផងនោះ ហើយមូយវិញទៀត ប្រទេសកម្ពុជាយើងបច្ចុប្បន្ន នៅតាមបណ្តាខេត្តនីមួយៗ សម្បូរផ្លែឈើដាំក្នុងស្រុកច្រើន ដូច្នេះការបញ្ជាទិញពីអតិថិជន មានតិចតួចប៉ុណ្ណោះ។
លោក គឹម អាន ភ្ញៀវទេសចរមកពីស្រុកសម្បូរខេត្តស្វាយរៀង បានទទួលស្គាល់ថា ផ្លែម្នាស់ដែលអាជីវករលក់នៅខេត្តស្ទឹងត្រែងនេះ ដែលគេនិយមបរិភោគនោះ គឺម្នាស់ទឹកឃ្មុំ មានរសជាតិផ្អែម តែឆ្នាំនេះ មិនសូវមានរសជាតិដូចឆ្នាំមុនៗនោះទេ ភាគច្រើនជួរ នៅខាងចុងផ្លែ ដែលធ្វើឱ្យអ្នកបរិភោគ មិនសូវចង់ទិញ ចំណែកអាជីវករលក់ក៏ត្អូញត្អែរថា មិនសូវដាច់ដែរ ។
លោក ទំ នីរ៉ូ ប្រធានមន្ទីរកសិកម្ម រុក្ខាមាញ់ និងនេសាទខេត្ត បានគាំទ្រចំពោះការប្រឹងប្រែងរបស់កសិករព្រោះកន្លងមក មន្ទីរបានបង្ហាត់បង្រៀនពីបច្ចេកទេសដាំដំណាំ កសិកម្មគ្រប់ប្រភេទ ជូនកសិករជាញឹកញាប់ ដើម្បីឱ្យពួកគាត់ដាំដុះដំណាំ ទទួលបានផលល្អ ។ លោកបានពន្យល់ថា ការដាំណាំកសិកម្មមានកត្តាបីយ៉ាងសំខាន់ គឺទី១. កត្តាជ្រើសរើសដី – ទី២.កត្តាជ្រើសរើសពូជ និងទី៣. គឺកត្តាថែទាំ ដែលកសិករត្រូវអនុវត្តជាចាំបាច់ ។
សូមបញ្ជាក់ថា ម្នាស់ទឹកឃ្មុំ បងប្អូនអាជីវករ មានដាក់តាំងលក់នៅចំណុចមុំ៣ អូរពងមាន់ ជាប់ផ្លូវជាតិ៧៨ និងឆ្ពោះទៅកាន់ខេត្តរតនគិរី និងនៅជិតស្ពានអូរច្រឡង់ ព្រំប្រទល់ខេត្តក្រចេះ-ស្ទឹងត្រែង មានតម្លៃមួយផ្លែចាប់ពី៥០០០រៀល រហូតដល់ទៅ ២០០០០រៀល ទៅតាមផ្លែតូចឬធំ ៕កុសល
