រដ្ឋាភិបាលរុស្ស៊ីនឹងបង្កើតក្រុមហ៊ុនថ្មីមួយដែលនឹងកាន់កាប់ប្រតិបត្តិការនៃគម្រោងអភិវឌ្ឍន៍ប្រេង និងឧស្ម័នធម្មជាតិSakhalin-2។ ក្រុមហ៊ុនជប៉ុនបានវិនិយោគលើគម្រោងនេះ។
ប្រធានាធិបតី វ្ល៉ាឌីមៀ ពូទីន បានចុះហត្ថលេខាលើក្រឹត្យមួយកាលពីថ្ងៃព្រហស្បតិ៍ ដើម្បីជំនួសប្រតិបត្តិករនៃគម្រោងខាងលើ ជាមួយនឹងក្រុមហ៊ុនរុស្ស៊ីថ្មីនោះគឺក្រុមហ៊ុនវិនិយោគSakhalin Energy។ក្រឹត្យនេះលើកឡើងពីការគំរាមកំហែងប្រឆាំងនឹងផលប្រយោជន៍ជាតិ និងសន្តិសុខសេដ្ឋកិច្ចរបស់រុស្ស៊ីជាហេតុផល។
ក្រុមហ៊ុនឧស្ម័នរដ្ឋដ៏ធំបំផុតរបស់រុស្ស៊ី Gazprom កាន់កាប់ភាគហ៊ុន 50 ភាគរយនៅក្នុងក្រុមហ៊ុន Sakhalin Energy។ ក្រុមហ៊ុនពាណិជ្ជកម្មជប៉ុនចំនួនពីរគឺក្រុមហ៊ុន Mitsui & Co និងក្រុមហ៊ុនMitsubishi Corporation មានភាគហ៊ុន12.5 ភាគរយនិង10 ភាគរយរៀងគ្នា។
ក្រឹត្យនេះនិយាយថា ម្ចាស់ភាគហ៊ុនបច្ចុប្បន្នត្រូវជូនដំណឹងដល់រដ្ឋាភិបាលក្នុងរយៈពេលមួយខែថាតើពួកគេចង់ទិញភាគហ៊ុននៅក្នុងក្រុមហ៊ុនថ្មីដែរឬទេ។
វាមិនប្រាកដទេថាការសម្រេចចិត្តចុងក្រោយរបស់រុស្ស៊ីនឹងប៉ះពាល់ដល់ក្រុមហ៊ុនជប៉ុនទាំងពីរដោយរបៀបណា។សូមរំលឹកថាក្រុមហ៊ុនប្រេងរបស់ចក្រភពអង់គ្លេស Shell បានប្រកាសកាលពីខែកុម្ភៈថា ខ្លួនមានបំណងដកខ្លួនចេញពីគម្រោងSakhalin-2៕
