ដោយ រតនា
ភ្នំពេញ៖ លោក ចេង មុនីរ៉ា ប្រធានកិត្តិយសអនុសាខា និងជាអភិបាលខណ្ឌច្បារអំពៅ និងលោកស្រី ហេង សុវត្ថា ប្រធានអនុសាខាកាកបាទក្រហមកម្ពុជាខណ្ឌ បានអញ្ជើញចុះសាកសួរសុខទុក្ខ និងនាំយកអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនបងប្អូនប្រជាពលរដ្ឋចំនួន ៣គ្រួសារ ដែលទទួលរងគ្រោះដោយអគ្គិភ័យឆេះផ្ទះសម្បែង នៅក្នុងភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ កាលពីព្រឹកថ្ងៃទី០៤ ខែកក្កដា ឆ្នាំ២០២២នេះ។
ពិធីចុះសួរសុខទុក្ខ និង នាំយកអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនបងប្អូនប្រជាពលរដ្ឋចំនួន ៣គ្រួសារ ដែលទទួលរងគ្រោះដោយអគ្គីភ័យឆេះផ្ទះនេះធ្វើឡើងនៅរសៀលថ្ងៃ០៤ ខែកក្កដា ឆ្នាំ២០២២នេះ បន្ទាប់ពីអគ្គិភ័យឆាបឆេះផ្ទះប្រជាពលរដ្ឋ ក្រោមវត្តមាន លោក ចេង មុនីរ៉ា ប្រធានកិត្តិយសអនុសាខា និងជាអភិបាលខណ្ឌច្បារអំពៅ និងលោកស្រី ហេង សុវត្ថា បប្រធានអនុសាខាកាកបាទក្រហមកម្ពុជាខណ្ឌ។ ក្នុងនោះដែរអំណោយដែលបានចែកជូន ប្រជាពលរដ្ឋ ក្នុងមួយគ្រួសារទទួលបាន អង្ករ២៥ គីឡូក្រាម ,ត្រីខកំប៉ុង មួយយួរ ,ទឹកត្រី មួយយួរ, មី មួយកេះ , សម្ភារៈផ្ទះបាយ និង ថវិកាមួយចំនួន ។
សូមរំលឹកផងដែរថាកាលពីព្រឹក ថ្ងៃទី០៤ ខែកក្កដា ឆ្នាំ២០២២ ចំណុចផ្ទះលេខ ៤៩៥ ស្ថិតនៅតាមបណ្ដោយផ្លូវលេខ៣៦៩ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។ អគ្គិភ័យឆាបើឆេះផ្ទះឈើប្រក សង្ក័សី ចំនួន ៣ខ្នង រងការខូចខាតទាំងស្រុង ២ខ្នង និង ខូចខាតរោលមួយខ្នងបង្កឲ្យមានការភ្ញាក់ផ្អើលដល់សមត្ថកិច្ចជួយអន្តរាគមន៍។
សូមបញ្ជាក់ផងដែរថានៅក្នុងករណីអគ្គិភ័យនេះ សមត្ថកិច្ចការិយាល័យបង្ការ និង ពន្លត់អគ្គិភ័យនៃស្នងការនគរបាលភ្នំពេញ សន្និដ្ឋានថា បណ្ដាលមកពី ឆ្លងចរន្តអគ្គីសនី និង ប្រើប្រាស់រថយន្តពន្លត់អគ្គិភ័យសរុបចំនួន ១៤គ្រឿង ប្រើប្រាស់ទឹកចំនួន ១៣ឡាន ស្មើរនឹង ៥៦ម៉ែត្រគូប ទើបរលត់ជាស្ថាពរទៅវិញនៅវេលាម៉ោង ០៨និង១០នាទីថ្ងៃដដែល៕
