ប្រធានាធិបតីស្រីលង្កាបានស្នើសុំជំនួយពីមេដឹកនាំរបស់រុស្ស៊ី លោក វ្ល៉ាឌីមៀ ពូទីន ដើម្បីទិញប្រេងឥន្ធនៈយកមកផ្គត់ផ្គង់ប្រទេស ដែលកំពុងជាប់គាំងក្នុងវិបត្តិសេដ្ឋកិច្ចដ៏អាក្រក់បំផុតរបស់ខ្លួនចាប់តាំងពីឯករាជ្យពីចក្រភពអង់គ្លេសនៅឆ្នាំ១៩៤៨។
លោក Gotabaya Rajapaksa បាននិយាយថា លោកមានការពិភាក្សាប្រកបដោយផ្លែផ្កាជាមួយលោក ពូទីន។កិច្ចពិភាក្សាបានកើតឡើង បន្ទាប់ពីរដ្ឋមន្ត្រីថាមពលរបស់ប្រទេសស្រីលង្កាបានព្រមានកាលពីចុងសប្តាហ៍ថាប្រទេសនេះអាចនឹងអស់សាំងក្នុងពេលឆាប់ៗនេះ។
កាលពីថ្ងៃពុធ មនុស្សរាប់រយនាក់បានដើរតាមដងផ្លូវនៃរដ្ឋធានីកូឡុំបូ ដើម្បីតវ៉ាប្រឆាំងនឹងរដ្ឋាភិបាល។
លោក Rajapaksa បានសរសេរសារនៅលើប្រព័ន្ធបណ្ដាញសង្គម Twitter ថា៖ “ខ្ញុំបានស្នើសុំការផ្តល់ជំនួយឥណទានដើម្បីនាំចូលឥន្ធនៈ”។
លោក Rajapaksa ក៏បានបញ្ជាក់ផងដែរថា លោកបានដាក់សំណើឱ្យមានជើងហោះហើរត្រង់រវាងរដ្ឋធានីមូស្គូ និងរដ្ឋធានីកូឡុំបូឡើងវិញ បន្ទាប់ពីក្រុមហ៊ុនអាកាសចរណ៍រុស្ស៊ី Aeroflot បានផ្អាកជើងហោះហើរនេះកាលពីខែមុន។
លោកបានបន្ថែមថា៖ “យើងបានឯកភាពគ្នាជាឯកច្ឆ័ន្ទថា ការពង្រឹងទំនាក់ទំនងទ្វេភាគីក្នុងវិស័យដូចជា ទេសចរណ៍ ពាណិជ្ជកម្ម និងវប្បធម៌ គឺជាកត្តាសំខាន់បំផុតក្នុងការពង្រឹងចំណងមិត្តភាពរវាងប្រជាជាតិទាំងពីររបស់យើង”។
ប្រទេសនេះបានទិញប្រេងពីរុស្ស៊ីរួចហើយក្នុងប៉ុន្មានខែថ្មីៗនេះ ដើម្បីជួយជំរុញការផ្គត់ផ្គង់ប្រេងឥន្ធនៈក្នុងអំឡុងពេលមានវិបត្តិ ហើយរដ្ឋាភិបាលបានផ្តល់សញ្ញាថាខ្លួនមានឆន្ទៈក្នុងការទិញបន្ថែមទៀតពីប្រទេសដែលសម្បូរថាមពល។
គួរបញ្ជាក់ផងដែរថា ការប៉ុនប៉ងរបស់លោក Rajapaksa ដើម្បីដោះស្រាយវិបត្តិសេដ្ឋកិច្ចដ៏អាក្រក់បំផុតរបស់ប្រទេសស្រីលង្កាក្នុងរយៈពេលជាង ៧០ ឆ្នាំ រួមទាំងការធានាការគាំទ្រផ្នែកហិរញ្ញវត្ថុពីប្រទេសឥណ្ឌានិងប្រទេសចិនដើម្បីផ្គត់ផ្គង់ប្រេងឥន្ធនៈ ថាមពល អាហារ និងរបស់របរចាំបាច់ផ្សេងៗទៀត រហូតមកដល់ពេលនេះបានបរាជ័យ៕
