ប្រធានាធិបតីប្រេស៊ីលលោក ជ៊ែរ ប៊ុលសូណារ៉ូ បាននិយាយកាលពីថ្ងៃព្រហស្បតិ៍ថា ទណ្ឌកម្មសេដ្ឋកិច្ចដែលដាក់ដោយលោកខាងលិចប្រឆាំងនឹងរុស្ស៊ីមិនមានប្រសិទ្ធភាពទេ។ការអត្ថាធិប្បាយរបស់លោក ប៊ុលសូណារ៉ូ ដែលទើបតែបានជួបជាមួយលោក ពូទីន កាលពីប៉ុន្មានថ្ងៃមុននេះ ទំនងជាអាចប៉ះពាល់ដល់ទំនាក់ទំនងជាមួយសហរដ្ឋអាមេរិក និងបណ្តាប្រទេសនៅអឺរ៉ុបជាច្រើន ដែលមុននេះបានរិះគន់លើការចូលរួមរបស់ប្រេស៊ីលជាមួយរុស្ស៊ី។
លោក ប៊ុលសូណារ៉ូ បានប្រាប់អ្នកគាំទ្រថា៖ “របាំងសេដ្ឋកិច្ចដែលសហរដ្ឋអាមេរិក និងអឺរ៉ុបដាក់លើរុស្ស៊ីមិនដំណើរការទេ ជំហររបស់ខ្ញុំចំពោះលោកពូទីននិងសង្រ្គាមគឺមានតុល្យភាព”។មេដឹកនាំប្រេស៊ីលបាននិយាយថា ជំហរនេះបានធ្វើឱ្យលោកទទួលបានជីសម្រាប់វិស័យកសិកម្មដ៏ធំរបស់ប្រទេសប្រេស៊ីលពីប្រទេសរុស្ស៊ី។ លោកក៏បានលើកឡើងផងដែរថា ប្រទេសរុស្ស៊ីបានចែករំលែកកង្វល់របស់ប្រេស៊ីលចំពោះអធិបតេយ្យភាពនៃព្រៃអាម៉ាហ្សូន។
លោកប្រធានាធិបតីជារឿយៗបានថ្លែងពីការរិះគន់ពីសំណាក់ប្រជាជាតិដទៃទៀតអំពីការគ្រប់គ្រងព្រៃឈើរបស់លោកថាជាការរំលោភលើអធិបតេយ្យភាពរបស់ប្រទេសប្រេស៊ីល។នៅព្រឹកថ្ងៃព្រហស្បតិ៍ លោក ពូទីន បាននិយាយថា វាច្បាស់ណាស់ថា ទណ្ឌកម្មរបស់លោកខាងលិចកំពុងបង្កការលំបាក ប៉ុន្ដែមិនបង្កការលំបាកដូចអ្វីដែលអ្នកផ្ដួចផ្ដើមគំនិតចង់បាននោះឡើយ។
គួរបញ្ជាក់ផងដែរថា កាលពីខែមិថុនាកន្លងទៅ លោក ប៊ុលសូណារ៉ូ និងលោក ពូទីន បានពិភាក្សាគ្នាអំពីសន្តិសុខស្បៀងអាហារពិភពលោកនៅក្នុងការហៅទូរស័ព្ទមួយ ហើយបានបញ្ជាក់ពីចេតនារបស់ពួកគេក្នុងការពង្រឹងភាពជាដៃគូយុទ្ធសាស្ត្ររបស់ប្រទេសទាំងពីរ៕
