អតីតនាយករដ្ឋមន្ត្រីជប៉ុនលោកអាបេ ត្រូវខ្មាន់កាំភ្លើងបាញ់ប្រហារ បុរសអាយុ៤១ឆ្នាំម្នាក់ត្រូវបានចាប់ខ្លួន

អតីតនាយករដ្ឋមន្ត្រីជប៉ុន លោក Shinzo Abe ត្រូវបានខ្មាន់កាំភ្លើងបាញ់ប្រហារចំដើមទ្រុង កំឡុងពេលថ្លែងសុរន្ទកថាមួយក្នុងទីក្រុង Nara ភាគខាងលិច ប្រទេសជប៉ុន។ប៉ូលិសបានចាប់ខ្លួនខ្មាន់កាំភ្លើងម្នាក់។
សារព័ត៌មានជប៉ុន NHK បានរាយការណ៍ថា អតីតនាយករដ្ឋមន្ត្រីជប៉ុនលោក Abe កំពុងស្ថិតក្នុងស្ថានភាពធ្ងន់ធ្ងរ ដោយសារមិនមានសញ្ញាជីវិតអ្វីឡើយ។

សាក្សីម្នាក់ដែលនៅក្នុងហេតុការណ៍និយាយថា លោក Abe បានដួលសន្លប់ភ្លាមៗ បន្ទាប់ពីត្រូវគ្រាប់ទី ២ ចំដើមទ្រូង ។
សាក្សីខាងលើដដែលបានបន្ថែមថា នៅគ្រាប់ទី ១ គេមិនបានឃើញនរណាម្នាក់ដួលនោះទេ ប៉ុន្តែក្រោយមកលោក Abe បានដួលភ្លាមៗ នៅពេលដែលការបាញ់ប្រហារគ្រាប់ទី ២ ។

ចំណែកខ្មាន់កាំភ្លើងដែលចាប់ខ្លួនបាននោះឈ្មោះ Yamagami Tetsuyaមានអាយុ ៤១ ឆ្នាំ។ប៉ូលិសបានចោទប្រកាន់ខ្មាន់កាំភ្លើងពីបទប៉ុនប៉ងមនុស្សឃាតនិងបានដកហូតកាំភ្លើង១ដើមផងដែរ។

សូមជម្រាបថាលោក Abe វ័យ ៦៧ ឆ្នាំត្រូវខ្មាន់កាំភ្លើងបាញ់ប្រហារនៅម៉ោង ១១ និង ៣០ នាទីព្រឹកថ្ងៃសុក្រ ខណៈលោកកំពុងថ្លែងសុន្ទរកថាលើដងផ្លូវ ដើម្បីប្រមូលការគាំទ្រចំពោះបេក្ខជនគណបក្សសេរីប្រជាធិបតេយ្យមុនការបោះឆ្នោតសភាជាន់ខ្ពស់ ដែលនឹងប្រព្រឹត្តិទៅនៅថ្ងៃអាទិត្យខាងមុខនេះ ៕