បន្ទាយមានជ័យ: លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដាក់ចេញនូវបទបញ្ជាយ៉ាងម៉ឺងម៉ាត់ ដល់នគរបាលទូទាំងខេត្តបន្ទាយមានជ័យ ទាំងអស់ត្រូវទប់ស្កាត់និងបង្ក្រាបឱ្យបានរាល់សកម្មភាពជួញដូរ លក់ចែកចាយ និងអ្នកប្រើប្រាស់បារីអេឡិចត្រូនិច ( Cigarettes Electronic )ដើម្បីកសាងសំណុំរឿងចាត់ការតាមច្បាប់។
លោកឧត្តមសេនីយ៍ស្នងការ បានបន្តថា: វិធានការ លុបបំបាត់ ទប់ស្កាត់ និងបង្ក្រាបការលក់ចែកចាយបារីអេឡិចត្រូនិចគឺជាការទប់ស្កាត់ការប្រើប្រាស់រូបភាពបារីអេឡិចត្រូនិច ហើយឈានទៅដល់ការប្រើប្រាស់សារធាតុញៀនឬប្រើប្រាស់ថ្នាំញៀនរបស់យុវវ័យនៅពេលអនាគតក៏ដូចជាការរួមគ្នាទប់ស្កាត់អំពើអសន្តិសុខក្នុងសង្គមផងដែរ ដែលវិធានការនេះត្រូវបានអនុវត្តន៍តាមសេចក្តីណែនាំរបស់អគ្គស្នងការនគរបាលជាតិ។
ការដាក់ចេញនូវបទបញ្ជានេះ ធ្វើឡើងនៅព្រឹកថ្ងៃទី១១ ខែកក្កដា ឆ្នាំ២០២២ ក្នុងកិច្ចប្រជុំបូកសរុបសភាពការណ៍ និង លទ្ធផលកិច្ចប្រតិបត្តិការ ប្រចាំឆមាសទី១ ឆ្នាំ២០២២ និងលើកទិសដៅបន្តសម្រាប់ឆមាសបន្ទាប់ នៅស្នងការដ្ឋាននគរបាលខេត្តបន្ទាយមានជ័យ៕
