រដ្ឋមន្ត្រីការបរទេសអាមេរិកលោកAntony Blinkenនិយាយថារុស្ស៊ីបានបណ្តេញជនជាតិអ៊ុយក្រែនរហូតដល់១.៦លាននាក់ចេញពីតំបន់គ្រប់គ្រងដោយរុស្ស៊ីនៅក្នុងប្រទេស។
លោកBlinkenបានចេញសេចក្តីថ្លែងការណ៍មួយកាលពីថ្ងៃពុធ ដោយថ្កោលទោសចំពោះការចោទប្រកាន់ថា មានការនិរទេសពលរដ្ឋអ៊ុយក្រែនយ៉ាងច្រើនទៅកាន់ប្រទេសរុស្ស៊ី។សេចក្ដីថ្លែងការណ៍បានប៉ាន់ប្រមាណថាមនុស្សចន្លោះពី900,000 ទៅ 1.6 លាននាក់ត្រូវបានផ្លាស់ប្តូរទីលំនៅដោយបង្ខំ រួមទាំងកុមារចំនួន 260,000នាក់។
សេចក្តីថ្លែងការណ៍ខាងដើមក៏បាននិយាយផងដែរថា អាជ្ញាធររុស្ស៊ីត្រូវបានគេរាយការណ៍ថាកំពុងប្រមូលទិន្នន័យជីវមាត្រ និងទិន្នន័យផ្ទាល់ខ្លួនរបស់មនុស្សទាំងនោះហើយបង្ខិតបង្ខំពួកគេឱ្យចុះហត្ថលេខាលើកិច្ចព្រមព្រៀងដើម្បីស្នាក់នៅក្នុងប្រទេសរុស្ស៊ីដោយរារាំងលទ្ធភាពរបស់ពួកគេក្នុងការត្រឡប់ទៅមាតុប្រទេសវិញដោយសេរី។
វាក៏និយាយផងដែរថា អាជ្ញាធរកំពុងដកហូតលិខិតឆ្លងដែនអ៊ុយក្រែន និងចេញឯកសាររុស្ស៊ីជំនួស ក្នុងកិច្ចខិតខំប្រឹងប្រែងជាក់ស្តែងមួយដើម្បីផ្លាស់ប្តូរការៀបចំបែបប្រជាសាស្រ្តនៃផ្នែកខ្លះនៅក្នុងប្រទេសអ៊ុយក្រែន។
លោក Blinken បាននិយាយថា ការផ្ទេរ និងនិរទេសជនស៊ីវិលខុសច្បាប់ រំលោភលើអនុសញ្ញាទីក្រុងហ្សឺណែវ និងជាឧក្រិដ្ឋកម្មសង្គ្រាម។ លោកបាននិយាយថា សហរដ្ឋអាមេរិកនឹងធ្វើការជាមួយសហគមន៍អន្តរជាតិ ដើម្បីឲ្យរដ្ឋាភិបាលរុស្ស៊ីទទួលខុសត្រូវចំពោះសកម្មភាពរបស់ខ្លួន៕
