អ្នកជំនាញផ្នែកសន្តិសុខចំនួនប្រាំបីនាក់ដែលបានពិនិត្យមើលវីដេអូធ្វើឃាតអតីតនាយករដ្ឋមន្ត្រីជប៉ុន លោក ស៊ីនហ្សូ អាបេ បាននិយាយថា គ្រាប់កាំភ្លើងទីពីរផ្ទុះក្នុងរយៈពេល ២.៥ វិនាទី បន្ទាប់ពីគ្រាប់ទីមួយ ហើយអង្គរក្សអាចជួយសង្រ្គោះជីវិតលោកបាន ប្រសិនបើពួកគេយកខ្លួនរងឬរុញចេញ។
អ្នកជំនាញជប៉ុន និងអន្តរជាតិបាននិយាយថា ការបរាជ័យក្នុងការការពារលោក អាបេ ពីការបាញ់គ្រាប់ទី២ បានកើតឡើង ដែលនេះជាការធ្វេសប្រហែសផ្នែកសន្តិសុខ រហូតឈានដល់ការធ្វើឃាតនាយករដ្ឋមន្ត្រីដែលកាន់អំណាចយូរបំផុតរបស់ប្រទេសជប៉ុនកាលពីថ្ងៃទី៨ ខែកក្កដាកន្លងទៅ។
អាជ្ញាធរជប៉ុន រួមទាំងលោកនាយករដ្ឋមន្ត្រី ហ្វូមីអូ គីសីដា បានទទួលស្គាល់បញ្ហាផ្នែកសន្ដិសុខ ហើយប៉ូលិសនិយាយថា ពួកគេកំពុងធ្វើការស៊ើបអង្កេត។បន្ថែមពីលើការលើកឡើងរបស់អ្នកជំនាញសន្តិសុខ ទីភ្នាក់ងារសារព័ត៌មានរ៉យទ័របានសាកសួរសាក្សីប្រាំមួយនាក់នៅកន្លែងកើតហេតុ និងពិនិត្យមើលវីដេអូជាច្រើនដែលមាននៅលើអ៊ីនធឺណិត ថតពីមុំផ្សេងៗគ្នា ដើម្បីមើលវិធានការសន្តិសុខ មុនពេលលោក អាបេ ត្រូវបានគេធ្វើឃាត។
សន្ដិសុខមិនបានឈរការពារលោក អាបេ វ័យ ៦៧ ឆ្នាំនៅពីក្រោយខ្នងឡើយ ខណៈពេលដែលលោកកំពុងឈេរថ្លែងសារនៅលើផ្លូវសាធារណៈ ហើយជនដែលបានបាញ់លោកមានឈ្មោះថា Tetsuya Yamagami អាយុ ៤១ ឆ្នាំ។ ជនបង្កបានដើរសំដៅមករកលោក អាបេ ដោយសន្ដិសុខពុំបានឆែកឆេររកអាវុធឡើយ។
លោក Kenneth Bombace ប្រធានក្រុមហ៊ុន Global Threat Solutions ដែលផ្តល់សេវាសន្តិសុខជូនលោក ចូ បៃឌិននៅពេលលោកជាបេក្ខជនប្រធានាធិបតីបាននិយាយថា៖ “ពួកគេគួរតែបានឃើញអ្នកវាយប្រហារដោយចេតនា ហើយដើរឆ្ពោះទៅទិសដែលនាយករដ្ឋមន្ត្រីបែរខ្នង និងធ្វើអន្ដរាគមន៍”។កាសែត Yomiuri បាននិយាយថា លោក Yamagami បានចូលមកក្បែរលោក អាបេ ប្រហែល ៧ ម៉ែត្រនៅពេលបាញ់គ្រាប់ទីមួយដែលបាញ់ខុស និងដើរចូលជិតប្រហែល ៥ ម៉ែត្រនៅពេលបាញ់គ្រាប់ទីពីរ៕
