ក្រុមកាំភ្លើងធំ Arsenal បានឈានដល់កិច្ចព្រមព្រៀងក្នុងតម្លៃខ្លួន៣០លានផោនជាមួយ Manchester City ក្នុងការផ្ទេរយកខ្សែការពារ Oleksandr Zinchenko។
បច្ចុប្បន្នZinchenko កំពុងស្ថិតនៅប្រកួតកម្ដៅសាច់ដុំត្រៀមរដូវកាលថ្មីនៅសហរដ្ឋអាមេរិកជាមួយក្រុមមេឃខៀវ Man City។ កីឡាករសញ្ជាតិអ៊ុយក្រែនខាងលើ រំពឹងថានឹងមកដល់ប្រទេសអង់គ្លេសវិញនៅប៉ុន្មានថ្ងៃខាងមុនដើម្បីបំពេញឯកសារផ្ទេរ។
គូសបញ្ជាក់ថាZinchenkoវ័យ២៥ឆ្នាំ គឺជាកីឡាករដែលលោក Pep Guardiola នាំមកចូលរួមជាមួយ City កាលពីឆ្នាំ២០១៦។ គេធ្លាប់បានជួយក្រុមឈ្នះពាន Premier League ៤ដង FA Cup ម្ដង League Cup ៤ដង និងបង្ហាញខ្លួនបាន១២៨ប្រកួតគិតគ្រប់កម្មវិធី។ រូបគេនឹងក្លាយជាកីឡាករទីពីរដែលផ្លាស់ពីក្រុមMan City មកកាន់ទឹកដី Emirates ក្នុងរដូវក្ដៅនេះ បន្ទាប់ពីការផ្ទេររបស់ Gabriel Jesus ក្នុងតម្លៃខ្លួន៤៥លានផោន៕
