បុកគ្នាពេញទំហឹង រងការខូចខាតទាំងសងខាង

ដោយ រតនា

ភ្នំពេញ៖ រថយន្តចំនួន ២ គ្រឿងបុកគ្នាពេញទំហឹង ក្បែរស្តុបនាគបាញ់ទឹកបណ្ដាលឲ្យរងការខូចខាតនិងមានមនុស្សរងរបួស។

ហេតុការណ៍នេះកើតឡើងនៅវេលាម៉ោង ១២ និង ១០ នាទីរំលងអាធ្រាតឈានចូលថ្ងៃទី ២០ ខែកក្កដា ឆ្នាំ២០២២ ចំណុចក្បែរស្តុបនាគបាញ់ទឹក ស្ថិតតាមបណ្តោយផ្លូវព្រះសីហនុ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានបញ្ជាក់ក្រុមការងារឲ្យបានដឹងថានៅមុនពេលកើតហេតុគេបានឃើញរថយន្តម៉ាក តូយ៉ូតាកូរ៉ូឡា មួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ 2X-4855 បើកបរដោយបុរសជនជាតិបរទេសម្នាក់និងនារី២ នាក់ រួមដំណើរតាមបណ្ដោយផ្លូវមហាវិថីព្រះសីហនុ ក្នុងទិសដៅពីលិចទៅកើត លុះពេលធ្វើដំណើរមកដល់ត្រង់ចំណុចកើតហេតុតែស្រាប់តែមានរថយន្តមួយគ្រឿង ម៉ាក Lexus LX470 ពណ៌ទឹកមាស ពាក់ស្លាកលេខ ភ្នំពេញ 2AF-6265 បើកបរដោយបុរសម្នាក់ធ្វេីដំណេីរស្របទិសគ្នា ក្នុងស្ថានភាពល្បឿនថែមទាំងខ្វះការប្រុងប្រយ័ត្ន ក៏បានរេចង្កូតបុកចំពីចំហៀងរថយន្ដពេញទំហឹងបណ្ដាលឲ្យរថយន្តម៉ាកToyota ជ្រុល ទៅបុកកែងចំណតរថយន្តរងការខូចខាតខ្ទិចទាំងស្រុងនិង បង្កឲ្យមានមនុស្សរងរបួសធ្ងន់ធ្ងរ ត្រូវ បាន រថយន្តសាមុយដឹកបញ្ជូនទៅសង្គ្រោះបន្ទាន់ភ្លាមៗផងដែល។ ចំណែកឯរថយន្តម៉ាក Lexus LX470 រងការ ខូចខាត ចំផ្នែក ខាង មុខ ជំហៀងខាងស្តាំបន្តិចបន្តួចតែប៉ុណ្តោះ។

ក្រោយពេលកើតហេតុសមត្ថកិច្ចជំនាញបានធ្វើការវាស់វែង រួចបានយករថយន្តទាំងពីរទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រងចាំធ្វើការដោះស្រាយគ្នានៅពេលក្រោយ៕