ដោយ រតនា
ភ្នំពេញ៖ យុវជនម្នាក់បានស្លាប់ក្រោយពេលបញ្ជូនដល់មន្ទីពេទ្យនិងយុវជនម្នាក់ទៀតបានរងរបួសធ្ងន់បន្ទាប់ពីជិះម៉ូតូឌុបគ្នាលឿនពេកមិនប្រយ័ត្នជ្រុលទៅបុករថយន្តតូយូតាព្រូសចំពាក់កណ្តាលទ្វារចំហៀងខាងឆ្វេងយ៉ាងពេញទំហឹងបណ្តាលអោយដួលបោកក្បាលនៅនិងថ្នល់។
ហេតុការណ៍គ្រោះថ្នាក់ចរាចរណ៍នេះដែរបានកើតឡើងនៅវេលាម៉ោង១១និង៤០នាទីយប់ថ្ងៃទី២០ខែកក្កដា ឆ្នាំ២០២២ ស្ថិតនៅតាមបណ្តោយផ្លូវ១៦៣កែងនិងផ្លូវ៣៥០ ក្នុងសង្កាត់ទួលស្វាយព្រៃទី១ ខណ្ឌបឹងកេងកងរាជធានីភ្នំពេញ។សពជនរងគ្រោះ មានឈ្មោះយ៉ែមផាត ភេទប្រុស អាយុ២០ឆ្នាំ មានស្រុកកំណើតនៅភូមិតាម៉ៅក្រោម ឃុំតាម៉ៅ ស្រុកព្រៃប្រសព្វ ខេត្តក្រចេះ
ប្រភពព័ត៌មានពីប្រជាពលរដ្ឋនៅកន្លែងកើតហេតុបានប្រាប់អោយដឹងថាមុនកើតហេតុគាត់បាន ឃើញបុរសម្នាក់រួមដំណើរជាមួយនិងមនុស្ស៥នាក់ទៀតមានស្រីនិងប្រុសបានបើករថយន្តម៉ាកតូយូតាព្រូសពណ៌ក្រហមមួយគ្រឿង ពាក់ផ្លាកលេខ ភ្នំពេញ 2AV-2435 បើកបរតាមបណ្តោយផ្លូវ១៦៣ក្នុងទិសដៅពីជើងមកត្បូងក្នុងល្បឿនលឿនមធ្យមលុះមកដល់ចំណុចកើតហេតុផ្លូវបំបែកជាបួនស្រាប់តែមានយុវជន២នាក់ជិះម៉ូតូធន់ធំមួយគ្រឿងពណ៌ខៀវជិះឌុបគ្នាតាមបណ្តោយផ្លូវ៣៥០ក្នុងទិសដៅពីកើតមកលិចក្នុងល្បឿនយ៉ាងលឿនខណះមកដល់ផ្លូវបំបែកជាបួនមិនបង្អង់ក៏ជ្រុលទៅបុករថយន្តតូយូតាព្រូសចំពាក់កណ្តាលទ្វារចំហៀងខាងឆ្វេងយ៉ាងពេញទំហឹងបណ្តាលអោយដួលប៉ើងចេញពីម៉ូតូបោកក្បាលនៅនិងថ្នល់រងរបួសធ្ងន់ទាំងពីរនាក់ត្រូវបានរថយន្តសាមុយដឹកយកទៅសង្រ្គោះបន្ទាន់ភ្លាមៗ ខណះពេលបញ្ជូនជនរងគ្រោះដល់មន្ទីពេទ្យដោយជនរងគ្រោះមានឈ្មោះយ៉ែមផាតរងរបួសធ្ងន់ពេកក៏ដាច់ខ្យល់ស្លាប់នៅឯមន្ទីពេទ្យតែម្តងចំណែកឯយុវជនម្នាក់ទៀតរបួសធ្ងន់នៅមិនទាន់ស្គាល់អត្តសញ្ញាណនោះទេ។
ក្រោយកើតហេតុសមត្ថកិច្ចមូលដ្ឋានបានចុះមកដល់ឃាត់ម្ចាស់រថយន្តយកទៅប៉ុស្តិ៍នគរបាលរដ្ឋបាលសង្កាត់ទួលស្វាយព្រៃទី១ដើម្បីសាកសួរបន្ត រួចទំនាក់ទំនងទៅផ្នែកជំនាញចរាចរណ៍ជំនាញក្រុងឲ្យចុះមកពិនិត្យនិងវាស់វែងយករថយន្តនិងម៉ូតូជនរងគ្រោះទៅរក្សាទុកនៅការិយាល័យចរាចរណ៍ផ្លូវគោកនៃស្នងការនគរបាលរាជធានីភ្នំពេញរង់ចាំឲ្យភាគីទាំងសងខាងដោះស្រាយនៅពេលក្រោយ។ចំណែកសពធ្វើកំណត់ហេតុប្រគល់សពអោយទៅក្រុមគ្រួសារយកទៅធ្វើបុណ្យតាមប្រពៃណី៕
