សហរដ្ឋអាមេរិកនិយាយថា ខ្លួននឹងបញ្ជូនប្រព័ន្ធមីស៊ីលHIMARS ដល់អ៊ុយក្រែន បួនគ្រឿងបន្ថែមទៀត ខណៈដែលយោធារុស្ស៊ីកំពុងបង្កើនការវាយលុករបស់ខ្លួន។រដ្ឋមន្ត្រីការពារជាតិអាមេរិកលោក Lloyd Austin បានប្រកាសជំនួយយោធាបន្ថែមសម្រាប់អ៊ុយក្រែន នៅក្នុងកិច្ចប្រជុំតាមអ៊ីនធឺណែតមួយកាលពីថ្ងៃពុធ។
លោកAustin បាននិយាយថា៖«នេះគឺជាដំណាក់កាលដ៏សំខាន់នៃជម្លោះ។ ដូច្នេះហើយ ការគាំទ្ររួមរបស់យើងសម្រាប់អ៊ុយក្រែនគឺសំខាន់និងបន្ទាន់»។គណៈប្រតិភូមកពីប្រទេសប្រហែល៥០បានចូលរួមក្នុងការប្រមូលផ្តុំលើកទីបួនដើម្បីពិភាក្សាអំពីការគាំទ្រសម្រាប់អ៊ុយក្រែន។
រដ្ឋមន្ត្រីការពារជាតិអ៊ុយក្រែន លោក Oleksii Reznikov បានពន្យល់ថា កងកម្លាំងរុស្ស៊ីកំពុងបន្តការបាញ់ផ្លោងយ៉ាងខ្លាំងក្លា ដើម្បីពង្រីកតំបន់ដែលពួកគេគ្រប់គ្រងនៅភាគខាងកើតអ៊ុយក្រែន។HIMARS គឺជាប្រព័ន្ធបាញ់គ្រាប់រ៉ូកែត ដែលក្នុងនោះគ្រាប់រ៉ូកែត៦គ្រាប់ត្រូវបានបំពាក់ ហើយសមត្ថភាពក្នុងការបាញ់របស់វាមានចម្ងាយចន្លោះពី៦០ទៅ១០០ គីឡូម៉ែត្រ និងអាចធ្វើការផ្លាស់ប្តូរទីតាំងបានយ៉ាងឆាប់រហ័សបំផុត។អាមេរិកបានផ្គត់ផ្គង់អ៊ុយក្រែន នូវប្រព័ន្ធមីស៊ីលខាងលើនេះចំនួន ១២ គ្រឿងរួមមកហើយ។ កងកម្លាំងអ៊ុយក្រែនកំពុងប្រើប្រាស់ពួកគេដើម្បីវាយប្រហារប៉ុស្តិ៍បញ្ជាការរុស្ស៊ីនិងគោលដៅយោធាផ្សេងទៀត។
បន្ទាប់ពីកិច្ចប្រជុំនោះលោក Austin បានប្រាប់អ្នកយកព័ត៌មានថា រុស្ស៊ីកំពុងបន្តការបាញ់ផ្លោងដោយឥតឈប់ឈររបស់ខ្លួន ដោយពណ៌នាថាវាជា “យុទ្ធសាស្ត្រដ៏ឃោរឃៅ ប្រៀបទៅនឹងភាពរន្ធត់នៃសង្គ្រាមលោកលើកទីមួយ”។
លោកបានបន្តថា៖ «អ៊ុយក្រែនត្រូវការកាំភ្លើង និងគ្រាប់រំសេវដើម្បីទប់ទល់ដើម្បីការពារ និងវាយបកវិញ» ដោយបន្ថែមថា អាមេរិកកំពុង «ប្រឹងប្រែងជាខ្លាំងក្នុងការរក្សានិងបង្កើនសន្ទុះនៃការបរិច្ចាគ»។
ប្រធានាធិបតីអ៊ុយក្រែន Volodymyr Zelenskyy បានស្វាគមន៍ជំនួយយោធាបន្ថែមនេះ។នៅក្នុងវីដេអូដែលបានចេញផ្សាយកាលពីថ្ងៃពុធ លោក Zelenskyy បាននិយាយថា៖ «វានឹងចាំបាច់ក្នុងការបង្កើនការផ្គត់ផ្គង់អាវុធទំនើបដល់អ៊ុយក្រែន ដើម្បីផ្តល់ឱ្យរដ្ឋរបស់យើងនូវការការពារដែនអាកាសប្រកបដោយប្រសិទ្ធភាព»៕
