ភ្នំពេញ៖ ជនសង្ស័យ ឆក់២នាក់គូស្នេហ៍ ត្រូវបាននគរបាលខណ្ឌសែនសុខ ស្រាវជ្រាវ ឃាត់ខ្លួន កាលពីវេលាម៉ោងប្រមាណ១០ព្រឹកថ្ងៃទី២៥ ខែកក្កដា ឆ្នាំ២០២២បន្ទាប់ពី ធ្វើសកម្មភាពឆក់ទូរស័ព្ទបានរយះពេល៣ថ្ងៃ ហើយទៅសំងំលាក់ខ្លួននៅក្នុងផ្ទះសំណាក់តាណានីតា ស្ថិតនៅ ក្នុងភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
ជនសង្ស័យ រូបនោះ ១.ឈ្មោះអូន សំណាង ហៅម៉ៅ ភេទប្រុសអាយុ៣៥ឆ្នាំស្នាក់នៅពុំពិតប្រាកដនិង២.ឈ្មោះជ័យ ស្រីពេជ្រភេទស្រី អាយុ២២ឆ្នាំ ស្នាក់នៅ តាមផ្ទះសំណាក់។ចំណែក នារីរងគ្រោះឈ្មោះជា មេត្តា ភេទស្រីអាយុ២២ឆ្នាំ ជាសិស្សស្នាក់នៅ សង្កាត់អូរបែកក្អមខណ្ឌសែនសុខ ។
តាមនគរបាល អោយដឹងថា ជនសង្ស័យ ២នាក់ ក្នុងចំណោម បក្សពួក៣នាក់ ដែលបានធ្វើសកម្មភាពឆក់ទូរស័ព្ទពស្រ្តីម្នាក់កាលពីល្ងាចថ្ងៃទី២២ ខែកក្កដា ឆ្នាំ២០២២ នៅតាមបណ្តោយផ្លូវ ៥៩៨ ក្នុងភូមិទំនប់ សង្កាត់ភ្នំពេញថ្មី ខណ្ឌសែនសុខ រជធានីភ្នំពេញ។
តាមព័ត៌មានអោយដឹងថា នៅក្នុងសកម្មភាព ជនសង្ស័យ បានឆក់ទូរស័ព្ទម៉ាកអាយហ្វូន១៣ប្រូមេក បានសម្រេច បណ្តាលអោយ នារីរងគ្រោះដួល ម៉ូតូ រងរបួសជើង ។បន្ទាប់ពី ធ្វើសកម្មភាពឆក់ ជនសង្ស័យ បានគេចខ្លួនបាត់ហើយនារីរងគ្រោះពុំបានមកដាក់ពាក្យបណ្តឹងនោះទេ ។ តាមរយះពេល កាម៉េរ៉ា សុវត្តិភាព នៅកន្លែងកើតហេតុសមត្ថកិច្ច ក៍បានចុះទៅស្រាវជ្រាវ ឈានទៅកំណត់មុខ សញ្ញាជនសង្ស័យ ។លុះនៅព្រឹកថ្ងៃទី២៥ ខែ កក្ដដា ឆ្នាំ ២០២២ សមត្ថកិច្ចក៍បានទទួលដំណឹងថា មានជនមួយក្រុមប្រមូលគ្នានៅផ្ទះសំណាក់ខាងលើ ក៍បានចុះទៅត្រួតពិនិត្យ ឈានទៅឃាត់ខ្លួនបានជនសង្ស័យ ទាំង២នាក់តែម្តង ។បន្ទាប់ពីឃាត់ខ្លួន សមត្ថកិច្ចក៍បានដកហូតបានទូរស័ព្ទ របស់ជនរងគ្រោះនិងដកហូតបានម៉ូតូម៉ាកហុងដា ពណ៌ខ្លៅសេរី២០១៧ ពាក់ស្លាកលេខភ្នំពេញ១GG.០៣៥៥មួយគ្រឿង ដែលជាមធ្យោបាយ ធ្វើសកម្មភាពផងដែរ។
ជនសង្ស័យ ត្រូវបាននគរបាលបញ្ចូន ទៅកាន់អធិការដ្ឋាន ខណ្ឌសែនសុខសាកសួរនិងចាត់ការតាមច្បាប់ ៕
