អ្នកនាំពាក្យសន្តិសុខជាតិរបស់សេតវិមានលោក John Kirby និយាយថា លោកប្រធានាធិបតី Joe Biden “នឹងបញ្ជាក់ម្តងទៀតថា មិនមានការផ្លាស់ប្តូរចំពោះការប្តេជ្ញាចិត្តរបស់អាមេរិកលើ”គោលនយោបាយចិនតែមួយ” នៅពេលដែលគាត់ពិភាក្សាជាមួយមេដឹកនាំចិនXi Jinping នៅក្នុងកិច្ចប្រជុំកំពូលនាពេលខាងមុខរបស់ពួកគេ។ការអត្ថាធិប្បាយរបស់លោកធ្វើឡើងបន្ទាប់ពីក្រុងប៉េកាំងបានសម្តែងការមិនពេញចិត្តយ៉ាងខ្លាំងចំពោះចំណាត់ការរបស់អាមេរិកទាក់ទងនឹងកោះតៃវ៉ាន់។
លោក Kirby បាននិយាយកាលពីថ្ងៃពុធថា ទីក្រុងវ៉ាស៊ីនតោននៅតែបន្ត “មិនចង់ឃើញបញ្ហាឆ្លងច្រកសមុទ្រឬភាពតានតឹងត្រូវបានដោះស្រាយដោយឯកតោភាគី ហើយប្រាកដណាស់មិនមែនដោះស្រាយដោយកម្លាំងទេ”។
ថ្មីៗនេះ ប្រធានសភាតំណាងរាស្រ្តអាមេរិកលោកស្រី Nancy Pelosi ត្រូវបានគេរាយការណ៍ថា កំពុងពិចារណាធ្វើទស្សនកិច្ចនៅតៃវ៉ាន់។លោកស្រី Pelosi ស្ថិតនៅលំដាប់ទីពីរបន្ទាប់ពីតំណែងប្រធានាធិបតី ដោយមានតែអនុប្រធានាធិបតីមួយរូបប៉ុណ្ណោះ ដែលស្ថិតនៅពីលើលោកស្រី។
កាលពីខែឧសភា លោក Biden បានឆ្លើយ “បាទ” នៅពេលសួរដោយអ្នកសារព័ត៌មានក្នុងសន្និសីទសារព័ត៌មានថាតើសហរដ្ឋអាមេរិកនឹងចូលរួមផ្នែកយោធាដើម្បីការពារកោះតៃវ៉ាន់ដែរឬទេ៕
