ភ្នំពេញ៖ ដ្បិតសកម្មភាពដាក់អន្ទាក់ចាប់សត្វបានក្លាយជាកត្តាគំរាមកំហែងធ្ងន់ធ្ងរដល់ជីវិតសត្វព្រៃនៅកម្ពុជា និងធ្វើឱ្យប្រព័ន្ធជីវៈចម្រុះមានភាពប្រែប្រួលបែបណាក្តី តែសកម្មភាពល្មើសនេះនៅតែពុំមានភាពអន់ថយណោះឡើយ។ របាយការរបស់ក្រសួងបរិស្ថានកាលពីពេលថ្មីៗកន្លងមកនេះបានបង្ហាញថា ចំនួនអន្ទាក់ដែលមន្ត្រី និងអង្គការដៃគូរនានាប្រមូលបានពីតំបន់ការពារធម្មជាតិ និងរបៀងជីវៈចម្រុះនៅតែមានការកើនឡើង។ ចំនួនអន្ទាក់ដែលប្រមូលបានពីសកម្មភាពល្មើសនៅក្នុងមួយឆ្នាំៗបានកើនពីចំនួនប្រមាណ ៤ម៉ឺន (៤០០០០) អន្ទាក់ នាឆ្នាំ២០១៩ រហូតចំនួន ៦ម៉ឺន១ពាន់៦រយ១១អន្ទាក់ (៦១៦១១) នាឆ្នាំ២០២១។
ផ្អែកតាមការផ្សព្វផ្សាយព័ត៌មានរបស់ក្រសួងបរិស្ថាននាថ្ងៃទី២៨ ខែកក្កដា ឆ្នាំ២០២២ បានបញ្ជាក់ថា ក្នុងចន្លោះឆ្នាំ ២០១០ ដល់ ២០១៩ គ្រាន់តែនៅក្នុងតំបន់ការពារធម្មជាតិចំនួនប្រាំក្នុងប្រទេសកម្ពុជា រួមមានឧទ្យានជាតិភ្នំក្រវាញ ដែនជម្រកសត្វព្រៃគូលែនព្រហ្មទេព ដែនជម្រកសត្វព្រៃកែវសីមា ដែនជម្រកសត្វព្រៃស្រែពក និងដែនជម្រកសត្វព្រៃភ្នំព្រេច មន្ត្រីបានធ្វើការដកហូតអន្ទាក់សរុបចំនួន ២៣៤២៩១។
បន្ថែមលើនេះ នាឆ្នាំ២០២១ មានអន្ទាក់ដល់ទៅ ៦១៦១១ ត្រូវបានយកចេញពីតំបន់ការពារធម្មជាតិ និងរបៀងជីវៈចម្រុះចំនួន ៧២កន្លែង នៅក្នុងប្រទេសកម្ពុជា។ ចំនួននេះបានបញជាក់អំពីការកើនឡើងលើសពីចំនួនជាមធ្យមក្នុងរយៈពេល១០ឆ្នាំចុងក្រោយ ដែលមានចំនួនអន្ទាក់ប្រមាណត្រឹម ៤០០០០ ប៉ុណ្ណោះត្រូវបានដកហូតនៅក្នុងមួយឆ្នាំៗ។ បើតាមរបាយការរបស់ក្រសួងបរិស្ថានដដែលបានអះអាងថា ចំនួននេះគ្រាន់តែជាចំណែកដ៍តូចប៉ុណ្ណោះនៃចំនួនអន្ទាក់ដែលត្រូវបានប៉ាន់ប្រមាណថា បានដាក់ប្រើប្រាស់ក្នុងព្រៃនៃប្រទេសកម្ពុជា។ ហើយបញ្ហានេះនៅតែបន្តគម្រាមកំហែងយ៉ាងធ្ងន់ធ្ងរចំពោះជីវិតសត្វព្រៃ ជាពិសេសប្រភេទសត្វជិតផុតពូជ។ ដើម្បីដោះស្រាយវិបត្តិអន្ទាក់នេះ ក្រសួងរដ្ឋាភិបាលដែលទទួលខុសត្រូវ និងអង្គការអភិរក្សអន្តរជាតិបានសហការគ្នាប្រកាសចាប់ផ្តើមយុទ្ធនាការ “អន្ទាក់សូន្យ” នៅក្នុងតំបន់ការពារធម្មជាតិកម្ពុជា។
គោលបំណង គឺដើម្បីលើកកម្ពស់ការយល់ដឹងស្តីពីការប្រើប្រាស់អន្ទាក់សត្វខុសច្បាប់ និងប្តេជ្ញាចិត្តរួមគ្នាក្នុងការលុបបំបាត់ការដាក់អន្ទាក់នៅក្នុងតំបន់ការពារធម្មជាតិកម្ពុជា ដើម្បីឲ្យសត្វព្រៃរបស់យើងអាចផ្លាស់ទីបានដោយសេរីនិងសុវត្ថិភាពនៅក្នុងតំបន់ការពារទាំងនោះ។ សូមបញ្ជាក់ថា ក្រសួងបរិស្ថានបានប្រកាសបើក យុទ្ធនាការអន្ទាក់សូន្យ នាខេត្តស្ទឹងត្រែងកាលពីថ្ងៃទី៧ ខែមេសា ឆ្នាំ២០២២។ យុទ្ធនាការនេះនឹងធ្វើឡើងក្នុងរយៈពេល ៦ខែ នៅតាមបណ្តាខេត្តចំនួន ៦ ដែលមានភូមិសាស្ត្រស្ថិតនៅភាគខាងកើតទន្លេមេគង្គ រួមមានខេត្តស្ទឹងត្រែង ក្រចេះ មណ្ឌលគិរី រតនគិរី ព្រះវិហារ និងកំពង់ធំ ហើយផ្តួចផ្តើម និងដឹកនាំធ្វើដោយក្រសួងបរិស្ថាន និងអង្គការដៃគូ ដែលសហការក្នុងការងារអភិរក្ស៕
