អធិការបតីអូទ្រីសលោក Karl Nehammerបាននិយាយនៅថ្ងៃព្រហស្បតិ៍សប្ដាហ៍នេះថាការហាមប្រាមលើឧស្ម័នរុស្ស៊ីនៅក្នុងសហភាពអឺរ៉ុប(EU)គឺ”មិនអាចទៅរួចនោះទេ”ដោយសារតែការពឹងផ្អែកយ៉ាងខ្លាំងរបស់ប្រទេសសហភាពអឺរ៉ុបលើថាមពលរុស្ស៊ី។
ការអត្ថាធិប្បាយរបស់លោក Nehammer ខាងលើនេះបានធ្វើឡើងបន្ទាប់ពីកិច្ចប្រជុំមួយជាមួយនឹងលោក Viktor Orbanនាយករដ្ឋមន្ត្រីហុងគ្រី ដែលកំពុងធ្វើទស្សនកិច្ចនៅទីក្រុងVienna។យោងតាមទីភ្នាក់ងារសារព័ត៌មានអូទ្រីស APA លោក Nehammer បាននិយាយនៅក្នុងសន្និសីទសារព័ត៌មានថា ការពឹងផ្អែករបស់អាល្លឺម៉ង់និងអូទ្រីសលើឧស្ម័នរុស្ស៊ី ធ្វើឱ្យការហាមឃាត់របស់សហភាពអឺរ៉ុប “មិនអាចទៅរួច” ដោយសារតែការធ្លាក់ចុះនៃសេដ្ឋកិច្ចអាល្លឺម៉ង់ក៏នឹងប៉ះពាល់ដល់ប្រទេសអូទ្រីសនិងនាំទៅរកភាពអត់ការងារធ្វើយ៉ាងច្រើនផងដែរ។
កាលពីថ្ងៃអង្គារ,រដ្ឋជាសមាជិកសហភាពអឺរ៉ុបបានយល់ព្រមលើការកាត់បន្ថយដោយស្ម័គ្រចិត្ត15ភាគរយនៃតម្រូវការឧស្ម័នធម្មជាតិពីបរិមាណជាមធ្យមឆ្នាំ2017-2021 ដើម្បីរៀបចំសម្រាប់ការរំខានការផ្គត់ផ្គង់ដែលអាចកើតមានក្នុងរដូវរងារខាងមុខនេះ។នៅក្នុងសន្និសីទសារព័ត៌មាន លោក Nehammer ក៏បានរិះគន់ភាពយឺតយ៉ាវរបស់EU ក្នុងការបង្កើតយន្តការទិញថាមពលរួមគ្នាផងដែរ។
លោកបានបន្តថាវេទិកាថាពលរួមនៅពេលនេះមានសារៈសំខាន់ជាងពេលណាៗទាំងអស់ ដើម្បីបញ្ចៀសការប្រកួតប្រជែងរវាងប្រទេសសហភាពអឺរ៉ុប។
លោកបានបន្ថែមថា៖«យើងបានឃើញការប្រកាសជាច្រើនដោយគណៈកម្មការអឺរ៉ុប ប៉ុន្តែមានការអនុវត្តតិចតួចប៉ុណ្ណោះ»៕
