លោកស្រី Nancy Pelosi ប្រធានសភាតំណាងរាស្រ្តអាមេរិក បានចាប់ផ្តើមដំណើរទស្សនកិច្ចទៅកាន់ប្រទេសអាស៊ីចំនួន ៤កាលពីថ្ងៃអាទិត្យម្សិលមិញ។ នេះបើតាមការប្រកាសព័ត៌មានពីការិយាល័យរបស់លោកស្រីប៉ុន្តែមិននិយាយអំពីកោះតៃវ៉ាន់ទេ ចំពេលមានការរំពឹងទុកថាលោកស្រីអាចទៅបំពេញទស្សនកិច្ចកោះមួយនេះ។
ការិយាល័យរបស់លោកស្រីបាននិយាយនៅក្នុងសេចក្តីប្រកាសព័ត៌មានកាលពីថ្ងៃអាទិត្យថា៖«លោកស្រី Nancy Pelosi កំពុងដឹកនាំគណៈប្រតិភូសភា ទៅកាន់តំបន់ឥណ្ឌូប៉ាស៊ីហ្វិក រួមទាំងដំណើរទស្សនកិច្ចទៅកាន់ប្រទេសសិង្ហបុរី ម៉ាឡេស៊ី កូរ៉េខាងត្បូង និងជប៉ុន»។
ដំណើរទស្សនៈកិច្ចនេះនឹងរួមបញ្ចូលប្រទេសទាំងនោះ ប៉ុន្តែមិនបានបញ្ជាក់ថាតើលោកស្រី Pelosi អាចនឹងឈប់សំចតនៅកន្លែងផ្សេងទៀត ដែរឬក៏អត់នោះទេ។នេះបើយោងតាមសេចក្តីថ្លែងការណ៍។សេចក្តីថ្លែងការណ៍ខាងលើដដែលឱ្យដឹងថា៖ «ដំណើរនេះ នឹងផ្តោតលើបញ្ហាសន្តិសុខទៅវិញទៅមក ភាពជាដៃគូសេដ្ឋកិច្ច និងអភិបាលកិច្ចតាមបែបប្រជាធិបតេយ្យនៅក្នុងតំបន់ឥណ្ឌូប៉ាស៊ីហ្វិក»។ប្រទេសចិន បានចាត់ទុកដំណើរទស្សនកិច្ចរបស់មន្ត្រីអាមេរិកទៅកាន់កោះតៃវ៉ាន់ ថាជាការបញ្ជូនសញ្ញាលើកទឹកចិត្តដល់ជំរំគាំទ្រឯករាជ្យនៅលើកោះនេះ។
ទីក្រុងវ៉ាស៊ីនតោនមិនមានទំនាក់ទំនងការទូតជាផ្លូវការជាមួយតៃវ៉ាន់ទេ ប៉ុន្តែត្រូវបានចងភ្ជាប់ដោយច្បាប់ ក្នុងការផ្តល់ឲ្យកោះនេះនូវមធ្យោបាយដើម្បីការពារខ្លួន។ដំណើរទស្សនកិច្ចរបស់លោកស្រី Pelosi នឹងក្លាយជាការបង្ហាញពីការគាំទ្រយ៉ាងខ្លាំងរបស់សហរដ្ឋអាមេរិកចំពោះតៃវ៉ាន់។អ្នកវិភាគខ្លះនិយាយថា ប្រសិនបើលោកស្រីPelosi ធ្វើទស្សនកិច្ចនៅតៃវ៉ាន់នើ ភាពតានតឹងជុំវិញតៃវ៉ាន់អាចនឹងកើនឡើងភ្លាមៗ៕
