ខេត្តកំពង់ឆ្នាំងៈ ទំនប់ចាក់ទឹម ស្ថិតនៅភូមិ កោះខ្ទុម្ពឃុំជៀប ស្រុក ទឹកផុស ខេត្តកំពង់ឆ្នាំង ដែលដេីរតួជាទំនប់ផង ជាផ្លូវផង ដែលតភ្ជាប់ពីផ្លូវជាតិលេខ ៥៣ ស្រុកទឹកផុស សម្រាប់ប្រជាពលរដ្ឋធ្វើដំណើរចេញចូលប្រកបអាជីវកម្មផ្សេងៗ ពិសេសសម្រាប់ភ្ញៀវទេសចរជាតិ អន្តរជាតិធ្វើដំណើរទៅលេងកំសាន្តនៅរមណីយដ្ឋានទឹកធ្លាក់ថ្មក្រាលត្រូវបានទឹកជំនន់កាត់ដាច់ប្រហែលជិត ១០០ម៉ែត្រ កាលពីវេលាម៉ោងប្រហែល២រំលងអាធ្រាត្រថ្ងៃទី ២០ ខែ កក្កដា ឆ្នាំ២០២២ កន្លងមកបណ្ដាលអោយខូចខាតលំនៅដ្ឋានរបស់ប្រជាពលរដ្ឋនិងសត្វក្របីពីក្បាលត្រូវបានស្លាប់នោះ បច្ចុប្បន្នអាជ្ញាធរនិងជំនាញបានធ្វើស្ពានសំរាប់ឆ្លងកាត់បណ្ដោះអាសន្ន រួចហេីយ។
ក្រោយពីទំនប់មួយនេះបាក់ទៅប្រជាពលរដ្ឋដែលរស់នៅក្នុងមូលដ្ឋានភូមិកោះខ្ទុម្ព គឺមានការពិបាក ដោយប្រព័ន្ធភ្លើងត្រូវបានកាត់ផ្ដាច់ ការប្រកបមុខរបរចិញ្ចឹមជីវិត រកចំណូលដែលពឹងផ្អែកលើវិស័យទេសចរណ៍ នៅរមណីយដ្ឋានទឹកធ្លាក់ថ្មក្រាល ត្រូវបានកាត់ផ្ដាច់ទាំងស្រុងពីព្រោះភ្ញៀវមិនអាចធ្វើដំណើរចេញចូលបានគឺកាត់ផ្ដាច់សេដ្ឋកិច្ចប្រជាពលរដ្ឋដែលរស់នៅតំបន់នោះទាំងស្រុង។
ទោះបីជាអាជ្ញាធរនិងមន្ត្រីជំនាញបានធ្វើស្ពានបណ្ដោះអាសន្ន នោះរួចរាល់ក្តី ប៉ុន្តែ ប្រជាពលរដ្ឋដែលធ្វើដំណើរចេញចូល បានលើកឡើងថាពួកគាត់នៅតែមានការព្រួយបារម្ភព្រោះថាស្ពាននេះមិនសូវមានសុវត្ថិភាពចំពោះបងប្អូនដែលធ្វើដំណើរជាមួយរថយន្តឡើយ។
យ៉ាងណាក្តីប្រជាពលរដ្ឋសូមថ្លែងអំណរគុណចំពោះអាជ្ញាធរគ្រប់ជាន់ថ្នាក់និងជំនាញដែលពាក់ព័ន្ធដែលបានគិតគូរពីសុខទុក្ខនិងសុវត្ថិភាពនៃការរស់នៅនិងធ្វើដំណើររបស់ប្រជាពលរដ្ឋ៕
