មន្ទីរបញ្ចកោណបាននិយាយថា សហរដ្ឋអាមេរិកអាចនឹងបញ្ជូនទាហានបន្ថែមទៀតទៅកាន់ប្រទេសបាល់ទិក ប្រសិនបើចាំបាច់ដើម្បីការពារតំបន់នេះប្រឆាំងនឹងការគំរាមកំហែងដែលអាចកើតមានដោយរុស្ស៊ី។
ថ្លែងនៅក្នុងសន្និសីទសារព័ត៌មានជាមួយសមភាគីឡាតវី រដ្ឋមន្ត្រីការពារជាតិអាមេរិក លោក ឡយ អូស្ទីន(Lloyd Austin) ក៏បានពន្យល់ដែរថា ក្រុងវ៉ាស៊ីនតោននឹងធ្វើសមយុទ្ធយោធាបន្ថែមទៀតជាមួយប្រទេសឡាតវី លីទុយអានី និងអេស្តូនី។
លោកAustin ដែលកំពុងបំពេញទស្សនកិច្ចរយៈពេលពីរថ្ងៃនៅប្រទេសឡាតវី គឺជារដ្ឋមន្រ្តីការពារជាតិដំបូងគេរបស់អាមេរិកដែលមកទស្សនកិច្ចប្រទេសនេះក្នុងរយៈពេលជិតបីទសវត្សរ៍។
ក្នុងដំណើរទស្សនកិច្ចនេះ លោកបានបញ្ជាក់ម្តងទៀតថា សហរដ្ឋអាមេរិកប្តេជ្ញាជួយប្រទេសនានាក្នុងតំបន់ដើម្បីមានសម្ថភាពការពារខ្លួន៕
