រដ្ឋធានីវ៉ាស៊ីនតោន៖ ស្របពេល ចិនកំពុងតែតវ៉ាប្រឆាំងនឹងដំណើរទស្សនកិច្ចរបស់លោកស្រី ណាស៊ី ផេឡូស៊ី (Nancy Pelosi) ប្រធានសភាដ៏មានឥទ្ធិពល មកកាន់តៃវ៉ាន់ មិនទាន់ទាំងស្ងប់ចិត្ដផង សហរដ្ឋអាមេរិក ក៏បានបន្ដធ្វើសមយុទ្ធយោធា និង បញ្ជូនគណៈប្រតិភូ មកពីសភា មកកាន់ដែនកោះគ្រប់គ្រងដោយខ្លួនឯង ហើយឥឡូវបាញ់សាកល្បងមីស៊ីលផ្លោងអន្ដរទ្វីបបន្ថែមទៀត ដែលមើលទៅហាក់ ដូចជាចង់សំញើញ ដាក់ទីក្រុងប៉េកាំង។
សារព័ត៌មានឥណ្ឌា NDTV បានចេញផ្សាយ កាលពីរាត្រី ថ្ងៃអង្គារ ទី១៦ ខែសីហា បញ្ជាការការវាយប្រហារសកលរបស់កងទ័ពអាកាសសហរដ្ឋអាមេរិក បានបាញ់មីស៊ីលឆ្លងអន្ដរទ្វីប Minuteman III ចេញពីមូលដ្ឋានកងទ័ពអវកាសវ៉ាន់ឌិនបឺគ (Vandenberg) ស្ថិតក្នុងរដ្ឋកាលីហ្វ័រញ៉ា សហរដ្ឋអាមេរិក ឆ្លងកាត់មហាសមុទ្រប៉ាស៊ីហ្វិក កាលពីពាក់កណ្តាលអធ្រាត្រ ម៉ោងនៅក្នុងតំបន់។
មន្រ្ដីយោធាសហរដ្ឋអាមេរិក បានបញ្ជាក់ កាលពីថ្ងៃអង្គារ ថា កងទ័ពសហរដ្ឋអាមេរិក បានបាញ់សាកល្បងមីស៊ីលផ្លោងអន្តរទ្វីប មីនុតមែន ស្រ៊ី (Minuteman III) ក្រោយការពន្យារពេល នាពេលកន្លងមក ដើម្បីបញ្ចៀសនូវភាពតានតឹង ជាមួយនឹងក្រុងប៉េកាំង ដែលកំពុងតែធ្វើសមយុទ្ធយោធា ឡោមព័ទ្ធកោះតៃវ៉ាន់ ប្រឆាំងនឹងដំណើរទស្សនកិច្ចរបស់លោកស្រី ណានស៊ី ផេឡូស៊ី ប្រធានសភាដ៏មានឥទ្ធិពលរបស់សហរដ្ឋអាមេរិក មកកាន់ដែនកោះគ្រប់គ្រងដោយខ្លួន ខណៈចិនអះអាងជាទឹកដីរបស់ខ្លួន។
មន្រ្ដីយោធាសហរដ្ឋអាមេរិក បានបញ្ជាក់ នៅក្នុងសេចក្ដីថ្លែងការណ៍របស់ខ្លួន ថា ការបាញ់សាកល្បងមីស៊ីលផ្លោងអន្តរទ្វីប Minuteman III ចេញពីមូលដ្ឋានកងទ័ពអវកាស វ៉ាន់ឌិនបឺគ (Vandenberg) ស្ថិតក្នុងរដ្ឋកាលីហ្វ័រញ៉ា ក៏បានបង្ហាញ អំពីការត្រៀមខ្លួនរបស់កងកម្លាំងនុយក្លេអ៊ែររបស់សហរដ្ឋអាមេរិក ក៏ដូចជា ការបង្ហាញពីប្រសិទ្ធភាព នៃសមត្ថភាពនុយក្លេអ៊ែររបស់ខ្លួនផងដែរ។
ក្រុងប៉េកាំង បានខឹងសម្បាយ៉ាងខ្លាំង ប្រឆាំងនឹងដំណើរទស្សនកិច្ចរបស់លោកស្រី ណាន់ស៊ី ផេឡូស៊ី ប្រធានសភាដ៏មានឥទ្ធិពលរបស់សហរដ្ឋអាមេរិក មកកាន់តៃវ៉ាន់ កាលពីដើមខែសីហា។ ជាមួយនឹងការប្រឆាំងតវ៉ានោះ ចិនបានដាក់ពង្រាយយន្តហោះយោធា និង នាវាចម្បាំងជាច្រើនគ្រឿង ធ្វើសមយុទ្ធយោធា បាញ់គ្រាប់ពិត ឡោមព័ទ្ធកោះតៃវ៉ាន់។ ប៉ុន្ដែដើម្បីកុំឲ្យចិនកាន់តែផ្ទុះកំហឹង បន្ថែមទៀតនោះ យោធាអាមេរិកបានសម្រេចចិត្ត ផ្អាកការសាកល្បងមីស៊ីលរបស់ខ្លួន មួយរយៈសិន ហើយទើបតែពេលនេះ បានបាញ់សាកល្បងមីស៊ីលផ្លោងអន្តរទ្វីប Minuteman III ដែលជាអាវុធយុទ្ធសាស្ត្រដ៏សំខាន់មួយរបស់សហរដ្ឋអាមេរិក។ មីស៊ីលអន្ដរទ្វីបនេះ អាចបាញ់បានចម្ងាយ ចាប់ពី ៩ ៦៦០គីឡូម៉ែត្រឡើងទៅ និង វាអាចហោះក្នុងល្បឿនអតិបរមា ២៤ ០០០គីឡូម៉ែត្រ ក្នុងមួយម៉ោង ថែមទៀតផង៕
