ក្រុមហ៊ុនថាមពលយក្សរបស់អាល្លឺម៉ង់ Uniper បានរាយការណ៍ពីការខាតបង់ច្រើនជាង 12 ពាន់លានអឺរ៉ូឬប្រហែល 12.5 ពាន់លានដុល្លារនៅក្នុងឆមាសទីមួយនៃឆ្នាំនេះដោយសារតែការកាត់បន្ថយការផ្គត់ផ្គង់ឧស្ម័នដ៏ច្រើនលើសលប់ពីប្រទេសរុស្ស៊ី។
Uniper កាលពីថ្ងៃពុធបានប្រកាសអំពីលទ្ធផលប្រាក់ចំនេញរបស់ខ្លួនសម្រាប់ខែមករាដល់ខែមិថុនា។ក្រុមហ៊ុនបាននិយាយថា ខ្លួនត្រូវបានបង្ខំឱ្យទិញឧស្ម័នពីទីផ្សារក្នុងតម្លៃខ្ពស់ជាងនេះ ដើម្បីប៉ះប៉ូវការផ្គត់ផ្គង់ឧស្ម័នធម្មជាតិដែលបានកាត់បន្ថយពីក្រុមហ៊ុន Gazprom ដែលគ្រប់គ្រងដោយរដ្ឋរុស្ស៊ី។
វាក៏បាននិយាយដែរថា ការចែកចាយឧស្ម័នរបស់រុស្ស៊ីតាមរយៈបំពង់បង្ហូរ Nord Stream ត្រូវបានថយចុះជាបណ្តើរៗចាប់តាំងពីពាក់កណ្តាលខែមិថុនា ហើយឥឡូវនេះគឺត្រឹមតែ 20 ភាគរយនៃកម្រិតមុនពេលមានសង្គ្រាមប៉ុណ្ណោះ។តម្លៃឧស្ម័ននៅទីផ្សារនៅតែខ្ពស់ដែលបន្ថែមការលំបាកដល់ក្រុមហ៊ុន។
ក្រុមហ៊ុន Uniper បាននិងកំពុងចែកចាយឧស្ម័នដែលបានទិញពីប្រទេសរុស្ស៊ីទៅកាន់រដ្ឋាភិបាលក្នុងតំបន់និងក្រុមហ៊ុននៅក្នុងប្រទេសអាល្លឺម៉ង់។សូមជ្រាបថានៅពេលនេះរដ្ឋាភិបាលអាល្លឺម៉ង់ប្រឈមនឹងបញ្ហាដើម្បីរក្សាក្រុមហ៊ុនឧស្ម័នខាងលើឱ្យនៅឈរស្ថិតស្ថេរ៕
