ម៉ឹង កុសលះ ២០ ០៨ ២០២២
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញបញ្ចុះបឋមសិលាបើកការដ្ឋានសាងសង់មហាចេតិយសម្រាប់តម្កល់អដ្ឋិធាតុ និងស្តូបរំលឹកគុណយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ។
ក្នុងពិធីក្រុងពាលី និង បញ្ចុះបឋមសិលាបើការដ្ឋានសាងសង់មហាចេតិយសម្រាប់តម្កល់អដ្ឋិធាតុ និង ជាស្តូបរំលឹកគុណយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា នៅតំបន់ប្រវត្តិសាស្ត្រយោធាតេជោកោះថ្ម X-16 ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ នៅព្រឹកថ្ងៃទី២០ ខែសីហា ឆ្នាំ២០២២នេះ សម្តេចពិជ័យសេនា ទៀ បាញ់ បានមានប្រសាសន៍ថា យើងដឹងស្រាប់ហើយពីប្រវត្តិតស៊ូ ដែលបានឆ្លងការលំបាកដ៏ស្មុគស្មាញបំផុត ក្នុងរយៈពេលរាប់ទស្សវត្សរ៍មកនេះ ជាពិសេសកិច្ចការដែលបានឈានមកដល់ថ្ងៃនេះ មានព្រឹត្តិការណ៍ដ៏ច្រើន ដែលក្នុងនោះព្រឹត្តិការណ៍ដ៏វិសេសវិសាលបំផុត គឺដំណើរនៃការចងចាំរបស់សម្តេចតេជោ ហ៊ុន សែន ដើម្បីស្វែងរកការរំដោះពីរបបប្រល័យពូជសាសន៍ ដែលវាមានភាពប្រទាក់ក្រឡាយ៉ាងច្រើន ក្លាយទៅជាប្រវត្តិសាស្រ្តដែលព្រះរាជាណាចក្រកម្ពុជាដែលមិនអាចមើលរំលងឬមិនអាចបំភ្លេចបានទេ។
សម្តេចពិជ័យសេនា បន្តថា វាជាការចាំបាច់ណាស់យើងត្រូវតែរកគ្រប់វិធីទាំងអស់ រៀបចំឱ្យកាន់តែល្អបន្ថែមទៀតអំពីប្រវត្តិសាស្ត្រដែលបានកើតឡើង នោះគឺតំបន់នេះ ហើយជាជំហានដំបូង ដើម្បីរំលឹកអំពីគុណូបការៈរបស់សម្តេចតេជោ ដែលបានប្រើប្រាស់អាយុជីវិតធ្វើជាដើមទុន ដើម្បីស្វែងរកការរំដោះជាតិដំណើរដ៏វែងឆ្ងាយនេះ បានបង្កើតនូវកងកម្លាំងប្រដាប់អាវុធសាមគ្គីសង្រ្គោះជាតិកម្ពុជា ។
សម្តេចពិជ័យសេនា បន្តទៀតថា ដោយសារភាពរីកចម្រើននៃសង្គម ធ្វើឱ្យយើងនឹកនាដ៏ប្រវត្តិសាស្រ្តដ៏លំបាកនេះដែលយើងបានរៀបចំសាងសង់មហាចេតិយសម្រាប់តម្កល់អដ្ឋិធាតុ និងស្តូបរំលឹកគុណយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា និងធាតុមាតុភូមិនិវត្តន៍នូវអធិដ្ឋិពីប្រទេសវៀតណាមមកតម្កល់នូវទីនេះវិញ។
គួរជម្រាបថា កាលពីថ្ងៃទី២០ ខែមិថុនា ឆ្នាំ២០២២ ក្នុងឱកាសអញ្ជើញប្រារព្ធខួប៤៥ឆ្នាំនៃទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧-២០ មិថុនា ២០២២) សម្តេចតេជោ ហ៊ុន សែន បានណែនាំឱ្យរៀបចំធ្វើមាតុភូមិអដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជាចំនួន ៤៩រូប ដែលបានបញ្ចុះនៅប្រទេសវៀតណាម។
សម្តេចតេជោ ហ៊ុន សែន បានគូសបញ្ជាក់ថា កម្ពុជាមានសុខសន្តិភាព មានលទ្ធភាព ដែលគួរដល់ពេលនាំអដ្ឋិធាតុយុទ្ធជនរំដោះជាតិគ្មានសាច់ញាតិទាំងនោះ ត្រឡប់មកកាន់ទឹកដីកំណើតវិញផងដែរ។ សម្តេចតេជោ ក៏បានណែនាំឱ្យរៀបចំកន្លែងតម្កល់អដ្ឋិធាតុយុទ្ធជនស្នេហាជាតិរបស់កម្ពុជានោះនៅតំបន់ប្រវត្តិសាស្ត្រយោធាតេជោកោះថ្ម X-16។
សម្តេចតេជោ ក៏ធ្លាប់បានគូសបញ្ជាក់ប្រាប់មន្ត្រីជាន់ខ្ពស់បក្សកុម្មុយនិស្តវៀតណាម កាលពីខែកក្កដា ឆ្នាំ២០២២នេះដែរថា អដ្ឋិធាតុរបស់យុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជាទាំង ៤៩រូប នឹងនាំមកតម្កល់នៅកម្ពុជាវិញនៅឆ្នាំ២០២៣៕
