ប្រធានាធិបតីហ្វីលីពីនលោក Ferdinand Marcos Jr កាលពីថ្ងៃចន្ទ បានស្នើសុំសភាពិនិត្យ អនុម័តកញ្ចប់ថវិការដ្ឋាភិបាលចំនួន ៥.២៩ ពាន់ពាន់លានប៉េសូ (៩៤.៤០ ពាន់លានដុល្លារ) សម្រាប់ប្រើប្រាស់ក្នុងឆ្នាំ២០២៣ ដើម្បីគាំទ្រគោលនយោបាយ ដែលមានមហិច្ឆតាជំរុញកំណើនសេដ្ឋកិច្ចនិងជួយមនុស្សរាប់លាននាក់ចេញពីភាពក្រីក្រ។
ថវិកាដែលបានស្នើឡើងដោយលោក Marcos ស្មើនឹង ២២.២% នៃទិន្នផលសេដ្ឋកិច្ចសរុបរបស់ប្រទេស ពោលគឺជិត ៥% ខ្ពស់ជាងផែនការចំណាយរបស់ប្រធានាធិបតីអាណត្តិមុនក្នុងឆ្នាំ២០២២។លោកប្រធានាធិបតីមានគោលបំណងពង្រីកសេដ្ឋកិច្ចអាស៊ីអាគ្នេយ៍ឱ្យបាន៨% ក្នុងអំឡុងពេលអាណត្តិ៦ឆ្នាំរបស់លោក ក៏ដូចរក្សាតំណែងរបស់ខ្លួនក្នុងចំណោមប្រទេសដែលរីកលូតលាស់លឿនបំផុតរបស់អាស៊ី និងកាត់បន្ថយអត្រាភាពក្រីក្រពាក់កណ្តាល ដែលអត្រាភាពក្រីក្រក្នុងឆ្នាំ២០២១ មាន១៨.១%។
វិស័យអប់រំ ហេដ្ឋារចនាសម្ព័ន្ធ សន្តិសុខស្បៀង ការថែទាំសុខភាព និងថាមពលស្អាត គឺជាអាទិភាពកំពូលនៅក្នុងសេចក្ដីព្រាងច្បាប់ហិរញ្ញវត្ថុ២០២៣ ដែលត្រូវបានបង្ហាញជូនសភាដោយតំណាងប្រធានាធិបតី។សភាត្រូវបានគេរំពឹងថានឹងអនុម័តថវិកានៅខែតុលា ហើយលោក Marcos ត្រូវបានគេរំពឹងថានឹងចុះហត្ថលេខាមុនដំណាច់ឆ្នាំ។
លោក Marcos បានបញ្ជាក់នៅក្នុងសេចក្តីថ្លែងការណ៍មួយថា វិស័យអប់រំនឹងទទួលបានថវិកាខ្ពស់បំផុតចំនួន ៨៥២.៨ ពាន់លានប៉េសូ ឬ ១៦% នៃថវិកាសរុប បន្ទាប់មកគឺការងារសាធារណៈ ១៣% ការថែទាំសុខភាព ៥% និងសុខុមាលភាពសង្គមប្រហែល ៤%។
គួរបញ្ជាក់ផងដែរថា លោក Marcos ដែលបានឈ្នះការបោះឆ្នោត កាលពីខែឧសភាកន្លងទៅ ក្ដោបក្ដាប់សម្លេងភាគច្រើនក្នុងព្រឹទ្ធសភា ហើយបងប្អូនជីដូនមួយរបស់លោកឈ្មោះ Ferdinand Martin Romualdez គឺជាប្រធានរដ្ឋសភា ដែលប្រការនេះទំនងជាអាចជំរុញលទ្ធភាពអនុម័តកញ្ចប់ថវិការបស់លោកខ្ពស់៕
