រដ្ឋធានីវ៉ាស៊ីនតោន៖ ស្របពេលភាពតានតឹង រវាងក្រុងប៉េកាំ និង តៃវ៉ាន់ នោះ កងទ័ពអាកាសរបស់សហរដ្ឋអាមេរិក បានបញ្ជូនយន្ដហោះបំបាំងកាយ ប្រភេទ F-22 Raptor រាប់សិបគ្រឿង ទៅដាក់ពង្រាយ នៅតំបន់សមុទ្រប៉ាស៊ីហ្វិក ហើយនេះជាការផ្ញើសារដ៏សំខាន់ដោយផ្ទាល់ ទៅកាន់ប្រទេសចិន។
សារព័ត៌មាន Military Billcyber បានចេញផ្សាយ កាលពីថ្ងៃទី២១ ខែសីហា ថា កងទ័ពអាកាសរបស់សហរដ្ឋអាមេរិក បានបញ្ជូនយន្តហោះចម្បាំងបំបាំងកាយដ៏ទំនើបបំផុតនៅលើពិភពលោក ប្រភេទ F-22 ជាង២០គ្រឿង ទៅធ្វើសមយុទ្ធ នៅភាគខាងលិច មហាសមុទ្រប៉ាស៊ីហ្វិក នៅក្នុងខែសីហានេះ។ ការដាក់ពង្រាយយន្តហោះដ៏មានអានុភាពខ្លាំងក្លា ខុសពីធម្មតានេះ ត្រូវបានអ្នកវិភាគ មើលឃើញថា នេះជាការបញ្ជូនផ្ញើសារដ៏មានឥទ្ធិពល ដោយផ្ទាល់ទៅកាន់សត្រូវរបស់ក្រុងវ៉ាស៊ីនតោន ដែលអាចកើតមាននៅក្នុងប្រទេសចិន។
កងទ័ពអាកាសសហរដ្ឋអាមេរិក ប្រចាំនៅតំបន់ប៉ាស៊ីហ្វិក បានបញ្ជាក់ នៅសប្ដាហ៍នេះ ថា យន្ដហោះចម្បាំងបំបាំងកាយដ៏មានអានុភាពខ្លាំងក្លា ប្រភេទ F-22 Raptor របស់សហរដ្ឋអាមេរិក ចំនួន២៥គ្រឿង នឹងត្រូវបញ្ជូន ចេញពីមូលដ្ឋានកងទ័ពអាកាសឆ្មាំសមុទ្រជាតិហាវ៉ៃ និង មូលដ្ឋានកងទ័ពចម្រុះអេមែនដូហ្វ-រីឆាដសុន (Elmendorf-Richardson) ស្ថិតក្នុងរដ្ឋអាឡាស្កា នឹងត្រូវបញ្ជូនទៅដាក់ពង្រាយ នៅកោះហ្គាម (Guam) និង កោះទីនៀន (Tinian) នៅខែនេះ សម្រាប់ប្រតិបត្ដិការដែកថែបប៉ាស៊ីហ្វិក ឆ្នាំ២០២២។
លោក កាល ស៊ូស្ទ័រ (Carl Schuster) អ្នកវិភាគវិស័យការពារជាតិ មានមូលដ្ឋាន នៅរដ្ឋហាវ៉ៃ និង ជាអតីតនាយកប្រតិបត្តិការ នៃមជ្ឈមណ្ឌលស៊ើបការណ៍សម្ងាត់ចម្រុះរបស់បញ្ជាការដ្ឋានប៉ាស៊ីហ្វិករបស់សហរដ្ឋអាមេរិក បានបញ្ជាក់ថា ការដាក់ពង្រាយយន្តហោះ F-22 ជាច្រើនគ្រឿង សម្រាប់ការធ្វើសមយុទ្ធយោធានេះ ក៏ជាការផ្ញើសារដ៏សំខាន់ ដោយផ្ទាល់ទៅកាន់ប្រទេសចិន ចំពេលទំនាក់ទំនងតានតឹង នៅតំបន់ប៉ាស៊ីហ្វិក ដូចជា តៃវ៉ាន់ និង សមុទ្រចិនខាងត្បូង។
សហរដ្ឋអាមេរិក កំពុងតែអនុវត្តយ៉ាងសកម្មនូវការដាក់ពង្រាយយន្ដហោះចម្បាំងបំបាំងកាយដ៏ទំនើប ដែលជាធម្មតា នឹងត្រូវធ្វើឡើង តែនៅក្នុងព្រឹត្តិការណ៍ នៃវិបត្តិ ឬសង្រ្គាមដ៏ធំប៉ុណ្ណោះ។ ប៉ុន្ដែបច្ចុប្បន្ន សហរដ្ឋអាមេរិក កំពុងតែផ្ដោតការយកចិត្តយ៉ាងខ្លាំង ទៅលើប្រទេសចិន ហើយកំពុងបង្កើនកម្លាំង និង បណ្តុះបណ្តាលកងទ័ពរបស់ខ្លួន ដើម្បីអាចឈានទៅកាន់គោលដៅ ឲ្យបានឆាប់រហ័ស។
បើតាមសេចក្ដីថ្លែងការណ៍របស់កងទ័ពអាកាសប៉ាស៊ីហ្វិក បានឲ្យដឹងថា សម្រាប់ប្រតិបត្ដិការដែកថែបប៉ាស៊ីហ្វិកនេះ គឺយន្ដហោះ F-15 ចំនួន១០គ្រឿង មកពីមូលដ្ឋានកងទ័ពអាកាស នៅអ៊ីដាហូ (Idaho) និង យន្ដហោះដឹកជញ្ជូន C-130 ចំនួន២គ្រឿង មកពីមូលដ្ឋានកងទ័ពអាកាសយ៉ូគូតា ប្រទេសជប៉ុន នឹងចូលរួមជាមួយនឹងយន្ដហោះ F-22 សម្រាប់ការបំពេញបន្ថែមដល់កងទ័ពអាកាស។ កងកម្លាំងទាំងនេះ ហៅថា ប្រតិបត្តិការការងារប្រយុទ្ធរហ័ស៕
