ដោយ រតនា
ភ្នំពេញ: បុរសម្នាក់ដែល ប្រជាពលរដ្ឋស្គាល់ថាជាមន្ត្រីកងអង្គរក្ស បានជិះម៉ូតូទៅយកសង្សា ចេញពីកន្លែងធ្វើការ មិនទាន់ដល់ផង ក៏ស្រាប់តែមានយុវជនស្ទាវ ៣នាក់ជិះម៉ូតូលឿនដូចហោះមកបុកពេញទំហឹង បណ្ដាលឲ្យបុរសជា មន្ត្រីអង្គរក្សបោកក្បាលស្លាប់។
ហេតុការណ៍នេះកើតឡើងកាលពីវេលាម៉ោង 10និង40នាទីយប់ ថ្ងៃទី២៤ ខែសីហា ឆ្នាំ២០២២ នៅចំណុចស្តុបក្ដាន់២ តាមបណ្ដោយមហាវិថីសហព័ន្ធរុស្សី ក្នុងសង្កាត់មិត្តភាព ខណ្ឌ៧មករា រាជធានីភ្នំពេញ ។សពមន្ត្រីអង្គរក្សមានឈ្មោះ ណន់ ថុក បម្រើការ នៅអង្គភាព បញ្ជាការដ្ឋានអង្គរក្ស អគ្គបញ្ជាការដ្ឋាន។
តាមប្រភពព័ត៌មានបានឲ្យដឹងថាមុនពេលកើតហេតុមានគេបានឃើញបុរសជាមន្ត្រីអង្គរក្ស បានជិះម៉ូតូមួយគ្រឿងម៉ាក ហុងដា PCX ពណ៌ខ្មៅ ពាក់ស្លាកលេខ ភ្នំពេញ 1JK-7241 បានធ្វើដំណើរតាមបណ្ដោយផ្លូវលេខ 169 ទិសដៅពីត្បូងទៅជើង គោលបំណងទៅយកនារីជាសង្សា នៅម្តុំបឹងកក់ ខណះពេលដែលធ្វើដំណើរមកដល់ចំណុចកើតហេតុ ក៏ស្រាប់តែមានយុវជនស្ទាវ ៣នាក់ បានជិះម៉ូតូមួយគ្រឿង ម៉ាក ហុងដា ឌ្រីម សេ125 សេរីឆ្នាំ2022 ពណ៌ក្រហម គ្មានស្លាកលេខ ដែលធ្វើដំណើរតាមបណ្ដោុយមហាវិថីសហព័ន្ធរុស្សី ទិសដៅពីលិចទៅកើត យ៉ាងលឿន ដោយចាប់ហ្វ្រាំងមិនទាន់ បានជ្រុលទៅបុក ម៉ូតូបុរសជាមន្ត្រី អង្គរក្ស ពេញទំហឹង បណ្ដាលឲ្យ បោកក្បាល ជាមួយថ្នល់ស្លាប់ ភ្លាមៗក្នុងថ្លុកឈាម។ ចំណែកយុវជនស្ទាវទាំង ៣នាក់រងរបួសធ្ងន់ស្រាល ត្រូវបានបញ្ជូនទៅព្យាបាល នៅមន្ទីរពេទ្យ។
ក្រោយពេលកើតហេតុមត្ថកិច្ចមូលដ្ឋានបានចុះមកដល់ និង ធ្វើការវាសវែងយក ម៉ូតូទាអ ២គ្រឿង ទៅរក្សាទៅ នៅអធិការដ្ឋាននគរបាលខណ្ឌ៧មករា រងចាំដោះស្រាយនៅពេលក្រោយ។ ចំណែកសពសមត្ថកិច្ច បានធ្វើឯកសារកំណត់ហេតុ យកទៅតម្កល់ទុក នៅវត្តទឹកថ្លា ដើម្បីរងចាំក្រុមគ្រួសារយកទៅធ្វើបុណ្យតាមប្រពៃណី៕
