លោក Itaru Nakamura ប្រធានទីភ្នាក់ងារប៉ូលីសជាតិរបស់ប្រទេសជប៉ុនបាននិយាយកាលពីថ្ងៃព្រហស្បតិ៍ថា លោកចង់លាលែងពីតំណែង ដើម្បីបង្ហាញទំនួលខុសត្រូវចំពោះការបាញ់សម្លាប់លោកអតីតនាយករដ្ឋមន្ត្រី ស៊ីនហ្សូ អាបេ កាលពីខែកក្កដាកន្លងទៅ។
ក្រុមអ្នកជំនាញបាននិយាយថា សន្តិសុខនៅទីក្រុងណារ៉ា ភាគខាងលិចប្រទេសជប៉ុន កាលពីថ្ងៃទី៨ ខែកក្កដា ដែលជាថ្ងៃលោក អាបេ ត្រូវបានឃាតកលបធ្វើឃាត ត្រូវបានសាធារណជនមើលឃើញថា មិនគ្រប់គ្រាន់។ក្រុមអ្នកជំនាញបានលើកឡើងបន្ថែមថា ក្រុមអង្គរក្សអាចជួយសង្គ្រោះលោក អាបេ បានប្រសិនបើពួកគេយកខ្លួនពាំងលោក អាបេ ឬរុញលោកចេញពីទីតាំងដែលលោកកំពុងឈរ ដោយសារគ្រាប់ទីមួយបាញ់ពុំត្រូវ ហើយគ្រាប់ទីពីរបានផ្ទុះក្នុងពេល ២.៥វិនាទីបន្ទាប់។
មន្ត្រីជប៉ុន រួមទាំងលោកនាយករដ្ឋមន្ត្រី ហ្វូមីអូ គីសីដា បានទទួលស្គាល់ថា បញ្ហាសន្តិសុខមានចន្លោះប្រហោងនៅពេលដែលលោក អាបេ បង្ហាញខ្លួនក្នុងព្រឹត្តិការណ៍ឃោសនាបោះឆ្នោត។ទីភ្នាក់ងារប៉ូលីសជាតិមុននេះបានប្រាប់កាសែតរ៉យទ័រថា ការធ្វើឃាតកើតមានឡើងដោយសារប៉ូលីសមិនបានបំពេញទំនួលខុសត្រូវរបស់ពួកគេ។ ទីភ្នាក់ងារប៉ូលីសជាតិក៏បានបង្កើតក្រុមមួយ ដើម្បីពិនិត្យឡើងវិញនូវវិធានការសន្តិសុខ និងការការពារផ្សេងៗផងដែរ៕
