ការងាររបស់គណៈកម្មការជំនាញត្រៀមស៊ីហ្គេមសម្រេចបានល្អប្រសើរទាំងអស់

ម៉ឹង កុសល( ២៥ ០៨ ២០២២)

គណៈកម្មការជំនាញ ទាំង១៤នៃគណៈកម្មាធិការជាតិរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ (CAMSOC & CAMPAGOC) មានវឌ្ឍនភាពការងារល្អប្រសើរ និងស្ថិតក្នុងដៃអស់ហើយ ដើម្បីឈានទៅរៀបចំព្រឹត្តិការណ៍នេះឲ្យបានរលូន និងប្រកបដោយគុណភាព។

ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និងជាអគ្គលេខាធិការ CAMSOC បានឱ្យដឹងថា ក្នុងកិច្ចប្រជុំគណៈអចិន្ត្រៃយ៍នៃគណៈកម្មាធិការជាតិ CAMSOC ដើម្បីត្រួតពិនិត្យ និងណែនាំយន្តការការងាររបស់គណៈកម្មការជំនាញ ក្រោមអធិបតីភាព ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ CAMSOC & CAMPAGOC កាលពីថ្ងៃទី២៤ ខែសីហា ឆ្នាំ២០២២ គណៈកម្មការជំនាញរបស់ CAMSOC ទាំង១៤បានធ្វើសេចក្តីរាយការណ៍ពីវឌ្ឍនភាពការងារមួយចំនួន និងបញ្ហាមួយចំនួនដែលត្រូវស្តាប់ការណែនាំ។

ឯកឧត្តម បានបញ្ជាក់ថា តាមការកំណត់ជាគោលការណ៍របស់ឯកឧត្តមបណ្ឌិត ថោង ខុន គឺត្រូវធ្វើសេចក្តីរាយការណ៍របស់គណៈកម្មការនីមួយៗមួយខែម្តង។ ក្នុងមួយខែម្តងត្រូវធ្វើរបាយការណ៍ជាក់លាក់អំពីការវិវឌ្ឍ និងបញ្ហាប្រឈម ហើយបញ្ហាប្រឈម និងការវិវឌ្ឍនេះត្រូវបានឯកឧត្តមបណ្ឌិត ថោង ខុន ដាក់ទៅក្នុងការត្រួតពិនិត្យ តាមដាន វាយតម្លៃនិងដាក់ចេញនូវយុទ្ធសាស្ត្រផ្សេងៗទៀត ដើម្បីដោះស្រាយបញ្ចៀសនូវការងាររាំងស្ទះដល់ដំណើរការនៃការរៀបចំដំណើរឆ្ពោះទៅការរៀបចំស៊ីហ្គេម។

ឯកឧត្តមបន្តថា គណៈកម្មការ នីមួយៗមានវឌ្ឍនភាពការងារល្អប្រសើរ បើតាមអង្គប្រជុំបានពិនិត្យឃើញ។ គណៈកម្មការជំនាញសំខាន់ៗបានដឹកមុខគឺថា មានការវិវឌ្ឍល្អ ហើយផែនការក៏ធ្វើបានល្អ ព្រមទាំងមានការទទួលខុសត្រូវមួយចំនួនហើយ។ នៅសល់តែបញ្ហាមួយចំនួនដែលយើងត្រូវតែពិភាក្សាគ្នា ជជែកគ្នា ហើយនឹងរកគន្លឹះដោះស្រាយ ហើយបន្ស៊ីគ្នាក្នុងកិច្ចសហប្រតិបត្តិការគ្នាទៅវិញទៅមក។ ។

ឯកឧត្តមបន្តទៀតថា អ្វីដែលកាន់តែពិសេសទៀតនោះក្នុងកិច្ចប្រជុំនេះ ឯកឧត្តមបណ្ឌិត ថោង ខុន បានកោតសរសើរចំពោះកិច្ចខិតខំប្រឹងប្រែង របស់គណៈកម្មការជំនាញនីមួយៗ និងបានធ្វើការវាយតម្លៃថា កិច្ចការទាំងអស់គឺស្ថិតនៅក្នុងដៃរបស់គណៈកម្មការជំនាញអស់ហើយ។ ដូច្នេះគណៈកម្មការជំនាញមានតែការចាប់ផ្តើមអនុវត្តការងាររបស់ខ្លួនចាប់ពីពេលនេះរហូតដល់បំណាច់ឆ្នាំ២០២២ នេះ គឺត្រូវឲ្យរួចរាល់ទាំងអស់ហើយឱ្យចេញជាលទ្ធផល ច្បាស់លាស់៕