សម្ពាធយ៉ាងធ្ងន់ បន្ដរុញច្រានឧត្ដមសេនីយ៍ ប្រាយុទ្ធ ចាន់អូចា ឲ្យបោះបង់តំណែងរដ្ឋមន្រ្ដីការពារជាតិ

រាជធានីបាងកក៖ ថ្វីបើលោកឧត្ដមសេនីយ៍ ប្រាយុទ្ធ ចាន់អូចា នៅតែអាចបន្ដកាន់តំណែងជារដ្ឋមន្រ្ដីក្រសួងការពារជាតិថៃ ក្រោយពេលពេលតុលាការធម្មនុញ្ញរបស់ប្រទេសអាស៊ានមួយនេះ បានសម្រេច ដកហូតតំណែងនាយករដ្ឋមន្រ្ដី ចេញពីគាត់យ៉ាងណាក្ដី ប៉ុន្ដែសម្ពាធកាន់តែធ្ងន់ជំរុញឲ្យលោកឧត្ដមសេនីយ៍ បន្ដបោះបង់តំណែងកំពូលចុងក្រោយមួយនេះបន្ថែមទៀត។

សារព័ត៌មាន Bangkok Post បានចេញផ្សាយ កាលពីព្រឹក ថ្ងៃសុក្រ ទី២៦ ខែសីហា ថា លោកឧត្ដមសេនីយ៍ ប្រាយុទ្ធ ចាន់អូចា (Prayut Chan-o-cha) បាអះអាងថា លោកនឹងនៅតែបន្ដការងារ ក្នុងឋានៈជារដ្ឋមន្រ្ដីក្រសួងការពារជាតិថៃ ថ្វីបើមានការអំពាវនា ទាមទារឲ្យគាត់ ចុះចេញពីតំណែងចុងក្រោយមួយនេះយ៉ាងណាក្ដី។

បើតាមប្រភពព័ត៌មាន ពីក្រសួងការពារជាតិថៃ បានឲ្យដឹងថា លោកឧត្តមសេនីយ៍ ប្រាយុទ្ធ កាលពីថ្ងៃព្រហស្បតិ៍ មិនបានចូលមកបម្រើការងារ នៅក្នុងក្រសួងការពារជាតិ នោះទេ។ ប្រភពដដែលនោះ បានអះអាងទៀតថា គាត់បានធ្វើជាប្រធានកិច្ចប្រជុំរបស់ក្រុមប្រឹក្សាការពារជាតិ ពីចម្ងាយ តាមរយៈវីដេអូទូរគមនាគមន៍ នៅក្នុងអ្វីដែលត្រូវគេមើលឃើញថា ជាការបន្ធូរបន្ថយសម្ពាធ ដែលកំពុងកើនឡើង មកលើគាត់ នៅក្នុងការទាមទារឲ្យចុះចេញពីតំណែងរដ្ឋមន្ត្រីក្រសួងការពារជាតិ។

នៅក្នុងកិច្ចប្រជុំនេះ ក៏មានការអញ្ជើញ ចូលរួមពីរដ្ឋលេខាធិការអចិន្ត្រៃយ៍របស់ក្រសួងការពារជាតិ អគ្គមេបញ្ជាការរងកងយោធពលភូមិន្ទថៃ មេបញ្ជាការកងទ័ពជើងទឹក និង ទ័ពអាកាស ព្រមទាំងនាយទាហានជាន់ខ្ពស់ ផងដែរ។

ថ្លែងបន្ទាប់ពីកិច្ចប្រជុំនោះ អ្នកនាំពាក្យ ក្រសួងការពារជាតិ លោកឧត្តមសេនីយ៍ កុងជៀប តានត្រាវ៉ានិច (Kongcheep Tantrawanich) បានបញ្ជាក់ ថា «លោកឧត្តមសេនីយ៍ ប្រាយុទ្ធ បានប្រាប់អ្នកចូលរួម កុំឱ្យព្រួយបារម្ភ អំពីគាត់ ហើយថា គាត់នឹងបន្តធ្វើការ ក្នុងនាមជារដ្ឋមន្ត្រីការពារជាតិ ដដែល។

លោកឧត្តមសេនីយ៍ កុងជៀប តានត្រាវ៉ានិច (Kongcheep Tantrawanich) បានសង្កត់ធ្ងន់ ថា «លោកឧត្ដមសេនីយ៍ Prayut អាច ឬមិនអាចវិលត្រឡប់ មកបំពេញការងារ នៅក្នុងក្រសួងការពារជាតិ វាអាស្រ័យលើការងារ»។

លោកឧត្ដមសេនីយ៍ ណារុង ផាន់ ចិតកែវថេ (Narongphan Jitkaewthae) អគ្គមេបញ្ជាការកងទ័ពថៃ បានទម្លាក់ការគាំទ្ររបស់គាត់ ទៅលើលោកឧត្តមសេនីយ៍ ប្រាយុទ្ធ (Prayut) ក្រោយពេលតុលាការធម្មនុញ្ញថៃ ដកហូតមុខតំណែងនាយករដ្ឋមន្រ្ដី ពីលោក ប្រាយុទ្ធ កាលពីថ្ងៃទី២៤ ខែសីហា។ ប៉ុន្ដែមេទ័ពកំពូលថៃ រូបនេះ នៅតែអះអាងថា លោកឧត្តមសេនីយ៍ ប្រាយុទ្ធ សមនឹងទទួលបាននូវការសរសើរ ចំពោះការគោរព តាមដីការបស់តុលាការធម្មនុញ្ញថៃ។

លោកឧត្ដមសេនីយ៍ ណារុង ផាន់ ចិតកែវថេ បានបញ្ជាក់ថា «លោកសូមកោតសរសើរ អំពីដំណើរការលទ្ធិប្រជាធិបតេយ្យ និង ការអនុវត្ដន៍ច្បាប់… នៅពេលស្ថាប័នតុលាការ ប្រាប់ទៅស្ថាប័ននីតិប្រតិបត្ដិ អំពីអ្វីត្រូវធ្វើ គឺស្ថាប័ននីតិប្រតិបត្ដិ បានបង្ហាញ អំពីសុច្ឆន្ទៈត្រូវអនុវត្ដ។ ដូច្នេះលោកឧត្ដមសេនីយ៍ ប្រាយុទ្ធ សមនឹងទទួលបាននូវការកោតសរសើរ ចំពោះការធ្វើជាសុភាពបុរស និង ធ្វើជាគំរូ»៕