ដោយ រតនា
ភ្នំពេញ៖ រថយន្តស៊េរីទំនើបមួយគ្រឿង បើកបរមិនបានប្រុងប្រយ័ត្ន បានរេចង្កូតបុកក្បាលនាគរបាំងថ្មពុះចែកទ្រូងផ្លូវបាក់អស់ចំនួនមួយកង់ និងបណ្ដាលឲ្យរថយន្តរងការខូចខាតយ៉ាងធ្ងន់ធ្ងរ។
ហេតុការណ៍មួយនេះកើតឡើងនៅវេលាម៉ោង ១ និង៣០ នាទីរំលងអាធ្រាតឈានចូលថ្ងៃទី ០២ ខែកញ្ញា ឆ្នាំ២០២២ ចំណុចស្តុបត្រឡប់បែក តាមបណ្តោយផ្លូវ៥៩៨ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានបញ្ជាក់ក្រុមការងារអោយបានដឹងថា៖ នៅមុនពេលកើតហេតុគេបានឃើញរថយន្តស៊េរីទំនើបម៉ាក SSANGYONG REXTON មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2BF-3959 បើកដោយបុរសម្នាក់បានធ្វើដំណើរតាមដងផ្លូវ ៥៩៨ ក្នុងទិសដៅពីលិចទៅកើត ខណៈពេលដែលធ្វើដំណើរមកដល់ត្រង់ចំណុចកើតហេតុខាងលើ បេីកបរដោយមិនបានប្រុងប្រយ័ត្នក៏បានរេចង្កូត បុកក្បាលនាគរបាំងថ្មពុះចែកទ្រូងផ្លូវបាក់អស់ចំនួន ១កង់និងបណ្ដាលឲ្យរថយន្តរងការខូចខាតចំផ្នែកខាងមុខនៃចំហៀងខាងឆ្វេងខ្ទិចស្ទេីតែទាំងស្រុង។
ក្រោយពេលកើតហេតុក៏មានវត្តមានរបស់កម្លាំងសម្ថកិច្ចមូលដ្ឋានបានចុះទៅត្រួតពិនិត្យ រួចរាយការណ៏បន្តទៅសមត្ថកិច្ចជំនាញចុះមកធ្វើការវាស់វែង និងបានយករថយន្តទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរងចាំធ្វើការដោះស្រាយគ្នាទៅតាមជំនាញនិតិវិធីច្បាប់នៅពេលក្រោយៗទៀតបន្តផងដែរ៕
