ឯកឧត្តម លេង វី រដ្ឋលេខាធិការក្រសួងមហាផ្ទៃ បានថ្លែងថា បន្ទាប់ពីសម្តេច អគមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា បាន អំពាវនាវ ដល់ ប្រជាពលរដ្ឋ ដែលបានមកជួបជុំគ្នានៅភូមិថ្មជល់ ឃុំត្បែង ស្រុកបន្ទាយ ខេត្តសៀមរាប ឲ្យវិលត្រលប់ទៅផ្ទះសម្បែង របស់ ខ្លួន វិញ ។ ដូច្នោះ ឯកឧត្តម តំណាងក្រសួងមហាផ្ទៃ និងគណៈកម្មការចំរុះខេត្តកំពង់ចាម និងសៀមរាប បានពិភាក្សាគ្នា ដើម្បីស្វែងរកវិធីដោះស្រាយ ឲ្យប្រជាពលរដ្ឋទាំងនោះ បានវិលត្រលប់ទៅផ្ទះ ឲ្យកូនចៅ ទៅបន្តសិក្សារៀនសូត្រ ជាពិសេស បងប្អូនបានវិលត្រឡប់ ទៅប្រកបរបបរកស៊ី និងទៅរស់នៅតាមស្រុកកំណើតវិញ ។
បន្ទាប់ ពី ចូលរួម ក្នុង កិច្ច ប្រជុំ ឯកឧត្តម គន់ សុភា អភិបាលរង ខេត្តកំពង់ចាម បានដឹកនាំគណៈកម្មាការចំរុះ ខេត្តកំពង់ចាម ដាក់របៀបវារៈ ត្រួតពិនិត្យកន្លែង ដែលប្រជាពលរដ្ឋ មកស្នាក់នៅជាមួយ លោក ខឹម វាសនា ដោយបានធ្វើការសម្របសម្រួល ដល់ប្រជាពលរដ្ឋ ចេញមកខាងក្រោយ ចែកនូវអាហារ ទឹក និងមាន ក្រុម គ្រូពេទ្យ រង់ចាំព្យាបាល នៅពេលដែលមានបញ្ហាសុខភាព ផងដែរ ។
ឯកឧត្តមអភិបាលរងខេត្ត ក៏បានឲ្យក្រុមកាងារ ចាក់ខ្សែរអាត់ផ្សព្វផ្សាយ សារអំពាវនាវ របស់សម្តេចតេជោ ហ៊ុន សែន ឲ្យប្រជាពលរដ្ឋវិលត្រលប់ ទៅលំនៅដ្ឋាន និងជួយសម្របសម្រួល ដោយការរង់ចាំដឹកជញ្ជូនបងប្អូនទៅដល់ខ្នងផ្ទះរៀងៗខ្លួនវិញ ។ ហេីយឯកឧត្តម ក៏បានបញ្ជាក់បន្ថែមដែរថា ការចោលផ្ទះ ចោលសម្បែង ចោលការងារមុខរបរ ចោលម៉ោង កូនចៅត្រូវសិក្សារៀនសូត្រ ដើម្បី មករស់នៅបែបនេះ មិនមែនជាការរត់គេចពីហានិភ័យនោះទេ តែកំពុងតែរត់មករកហានិភ័យទៅវិញទេ ជាពិសេស គ្រាន់តែរឿងប្រឈមនឹងការផ្ទុះឆ្លងជំងឺកូវីដ-១៩ តែមួយមុខនោះ គឺវាគ្រប់គ្រាន់នឹងប្រញាប់ចាកចេញពីទីនេះបាត់ទៅហើយ នេះមិនទាន់និយាយដល់ការចូលរួមគាំទ្រសកម្មភាពដែលត្រូវបានចាត់ទុកថា ខុសច្បាប់ទៀតផង ។ ដែលប្រការនេះ ធ្វើឲ្យខាតទាំងជីវភាព ខាតទាំងអនាគត ខាតទាំងកេរ្តិ៍ឈ្មោះមុខមាត់ សមល្មមនឹងដល់ពេលបែរងាកក្រោយ ហើយហ៊ាទទួលស្គាល់ការពិត និងវិលទៅរកផ្លូវត្រូវវិញ ។
ជាមួយគ្នា នោះ ក្រុមការងារខេត្តកំពង់ចាម ក៏បានពន្យល់ណែនាំថា ការចុះមកទទួលបងប្អូនប្រជាពលរដ្ឋនាពេលនេះ មិនមានការបង្ខិតបង្ខំមិនឱ្យជឿលើជំនឿផ្ទាល់ខ្លួនណាមួយនោះទេ ហើយក៏មិនមានហាមឃាត់ មិនឱ្យជួបជុំខាងផ្នែកនយោបាយនោះដែរ តែអ្វីៗធ្វើឡើងត្រូវស្ថិតនៅក្នុងរង្វង់ នៃក្របខណ្ឌច្បាប់ ហើយដាច់ខាតមិនត្រូវប៉ះពាល់ ទៅដល់សន្តិសុខសណ្តាប់សង្គម និងសុវត្ថិភាពសាធារណៈឡើយ។
គួរបញ្ជាក់ថា នៅថ្ងៃទី១ ខែកញ្ញា ឆ្នាំ២០២២ នេះ បងប្អូនប្រជាពលរដ្ឋ ដែលមកជួបជុំគ្នា ជាមួយ លោក ខឹម វាសនា នៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀបរាម មានចំនួនជាង ១.៥៣៣នាក់ ដែលបានចេញមកខាងក្រៅ ក្នុងនោះក៏មានប្រជាពលរដ្ឋខេត្តកំពង់ចាម មួយចំនួន ផងដែរ ៕
