អ្នកចាត់ការលោក Xavi បាននិយាយថាក្រុម Barcelona របស់លោកមានទម្រង់លេងល្អជាងក្រុម Bayern Munich និងសមឈ្នះការប្រកួតនៅយប់មិញនេះក្នុងពានរង្វាន់ UEFA Champions League ។
Bayern Munich លេងនៅក្នុងទឹកដីខ្លួនឯងមិនធ្វើឱ្យអ្នកគាំទ្ររាប់ម៉ឺននាក់ដែលចូលទស្សនាខកចិត្តនោះទេ។ ពួកគេរកបាន២គ្រាប់ ដើម្បីយកឈ្នះលើក្រុម Barcelona បាន និងរក្សាកំណត់ត្រាមិនចាញ់ក្រុមអ្នកមានបុណ្យឡើយក្នុងទឹកដីនេះ។
២គ្រាប់របស់ក្រុមម្ចាស់ផ្ទះ Bayernនោះ ធ្វើបានដោយខ្សែការពារ Lucas Hernandez និងខ្សែបម្រើប្រយុទ្ធ Leroy Sane។
ក្រោយបញ្ចប់ការប្រកួត អ្នកចាត់ការ Xavi បានបង្ហាញអារម្មណ៍មិនសប្បាយចិត្ត ដោយគិតថាក្រុមរបស់ខ្លួនសមតែឈ្នះ។ បុរសសញ្ជាតិអេស្ប៉ាញបាននិយាយទៅកាន់អ្នកយកព័ត៌មានថា Barca ល្អជាង Bayern នៅប្រកួតនេះជាពិសេសការគ្រប់គ្រងនៅវគ្គទីមួយ។ វាជាប្រកួតដែលត្រូវឈ្នះ ដោយសារក្រុមលេងដោយអារម្មណ៍ល្អនិងមានឱកាសទាត់ច្បាស់ៗ។
តាមរយៈលទ្ធផលខាងលើ Bayern ឈរកំពូលតារាងពូល C ឆ្លងកាត់២ប្រកួតមាន៦ពិន្ទុពេញ ខណៈ Barcelona នៅលេខពីរមាន៣ពិន្ទុស្មើគ្នាជាមួយ Inter Milan ខណៈដែល ក្រុមViktoria Plzan នៅបាតតារាង៕
