យុវជនម្នាក់បើកម៉ូតូវ៉ាទាក់ដៃចង្កូតដួលខ្ទាតចូលកង់រថយន្តកិនស្លាបភ្លាមៗ

ដោយៈចាន់តូ
ភ្នំពេញ=យុវជនម្នាក់បែកក្បាលស្លាប់ភ្លាមៗ បន្ទាប់ពីជិះម៉ូតូយ៉ាងលឿនវ៉ាជែញរថយន្តមិនប្រយ័ត្នបានទាក់ដៃចង្កូតបណ្ដាលឲ្យដួលខ្ទាតមនុស្សចូលកង់រថយន្ត កាលវេលាម៉ោង ១០និង៤០នាទីយប់ថ្ងៃអាទិត្យ ទី១៨ ខែកញ្ញា ឆ្នាំ២០២២តាមបណ្តោយផ្លូវណ័តព្រីត ក្នុងសង្កាត់ទឹកថ្លាខណ្ឌសែនសុខ រាជធានីភ្នំពេញ នៅមុខខារ៉ាអូខេ ឌឹឃ្វិនស៍។

ជនរងគ្រោះមិនត្រូវបានស្គាល់អត្តសញ្ញាណនោះទេវ័យប្រហែល២០ ឆ្នាំជាង ពាក់អាវយឺតពណ៌ខ្មៅដៃខ្លីស្លៀកខោកាប៊យ សម្បុលសល្មម ពាក់ស្បែកជើងផ្ទាត់។ ជិះម៉ូតូអឹមស្លាស់ ពណ៌ស ពាក់ស្លាកលេខភ្នំពេញ1HX.5081 ជិះតែម្នាក់ឯង។ចំណែករថយន្តបែនដឹកថ្ម ក្បាលពណ៌ស ពាក់ស្លាកលេខព្រះសីហនុ3A.2718អ្នកបើកបានរត់បាត់។

តាមប្រភពពីប្រជាពលរដ្ឋដែលឃើញហេតុការណ៍បានប្រាប់ឲ្យដឹងថាដំបូងឡើយគេឃើញរថយន្តបែនដឹកថ្មបើកតាមបណ្ដោយផ្លូវណ័តព្រីត ទឹសដៅពីត្បូងទៅជើងយ៉ាងលឿន។ខណៈមកដល់ចំណុចកើត ហេតុខាងលើក៏ស្រាប់តែមានម៉ូតូមួយគ្រឿងម៉ាកអឹមស្លាស់ បើកមកពីក្រោយបានវ៉ាជេញខាងឆ្វេងដៃ មិនប្រយ័ត្នបានទាក់ដៃចង្កូតនិងរថយន្តបណ្ដាលឲ្យដួលខ្ទាតមនុស្សចូលក្រោមកង់រថយន្តកិនបែកក្បាលខ្ទេចស្លាប់ភ្លាមៗនៅហ្នឹងកន្លែងកើតហេតុ។ចំណែករថយន្តមិនទាន់អស់ល្បឿនបានបើកទៅឈប់នៅមុខសាកលវិទ្យាល័យកម្ពុជាបានទុករថយន្តចោលបើកទ្វាររត់គេចខ្លួនបាត់ស្រមោល។

ក្រោយពីកើតហេតុសមត្ថកិច្ចជំនាញចរាចរណ៍ចុះមកវាស់វែងយកមធ្យោបាយទាំងពីរទៅរក្សាទុក នៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរងចាំដោះស្រាយគ្នានៅពេលក្រោយ។ចំណែកសពសមត្ថកិច្ចធ្វើកំណត់ហេតុរួចប្រគល់ឲ្យរថយន្តដឹកសពយកទៅតម្កល់ទុកនៅវត្តទឹកថ្លារង់ចាំសាច់ញាតិមកទទួលយកធ្វើបុណ្យតាមប្រពៃណី៕