លោក បៃឌិន៖ “ជំងឺរាតត្បាតកូវីដ-១៩ត្រូវបានបញ្ចប់នៅសហរដ្ឋអាមេរិក”

ប្រធានាធិបតីសហរដ្ឋអាមេរិក លោក ចូ បៃឌិន បានប្រកាសថា ជំងឺឆ្លងរាតត្បាតកូវីដ-១៩ត្រូវបានបញ្ចប់នៅសហរដ្ឋអាមេរិក បើទោះបីចំនួនប្រជាជនអាមេរិកដែលបានស្លាប់ដោយសារជំងឺនេះនៅតែបន្តកើនឡើងក្ដី។លោក បៃឌិន បាននិយាយថា ខណៈពេលដែលយើងនៅតែប្រឈមមុខនឹងបញ្ហា ប៉ុន្ដែស្ថានភាពកំពុងប្រសើរឡើងយ៉ាងឆាប់រហ័ស។

ស្ថិតិបង្ហាញថា ជាមធ្យមជនជាតិអាមេរិកជាង ៤០០ នាក់បានស្លាប់ដោយសារជំងឺកូវីដ-១៩នេះជារៀងរាល់ថ្ងៃ។ ប្រធានអង្គការសុខភាពពិភពលោក (WHO) បានលើកឡើងកាលពីសប្តាហ៍មុនថា ចុងបញ្ចប់នៃជំងឺឆ្លងរាតត្បាតគឺនៅជិតបង្កើយ។ក្នុងបទសម្ភាសន៍មួយចាក់ផ្សាយនៅលើប៉ុស្ដិ៍ CBS ក្នុងកម្មវិធី 60 Minutes លោក បៃឌិន បានបញ្ជាក់ថា សហរដ្ឋអាមេរិកនៅតែបន្ដបំពេញការងារជាច្រើន ដើម្បីគ្រប់គ្រងជំងឺនេះ។លោកបានថ្លែងថា៖ “ប្រសិនបើអ្នកសង្កេតមើល អ្នកឃើញថា គ្មានអ្នកណាម្នាក់ពាក់ម៉ាស់ទេ។ គ្រប់គ្នាហាក់ដូចជាមានស្មារតីល្អ… ខ្ញុំគិតថា វាមានការប្រែប្រួល”។

គួរបញ្ជាក់ផងដែរថា មកទល់ពេលនេះ ជនជាតិអាមេរិកជាងមួយលាននាក់បានស្លាប់ដោយសារជំងឺកូវីដ-១៩។ ទិន្នន័យពីសាកលវិទ្យាល័យ Johns Hopkins បង្ហាញថា ជាមធ្យម មានអ្នកស្លាប់៤០០នាក់ជារៀងរាល់ថ្ងៃ ដោយក្នុងសប្ដាហ៍មុន អ្នកស្លាប់សរុបមាន ៣,០០០នាក់។ ប្រហែល ៦៥% នៃចំនួនប្រជាជនអាមេរិកសរុបបានទទួលថ្នាំបង្ការពេញលេញ៕