សំរាមដបប្លាស្ទិកប្រមាណ១.៥០០តោន ត្រូវបានរំពឹងថា នឹងប្រមូលកែច្នៃឡើងវិញនៅត្រឹមដំណាច់ឆ្នាំ២០២២នេះ

ម៉ឹង កុសល (២០ ០៩ ២០២២)
សំរាមប្រភេទដបប្លាស្ទិកប្រមាណ១.៥០០តោន ត្រូវបានរំពឹងថា នឹងប្រមូលទៅធ្វើការកែច្នៃប្រើប្រាស់ឡើងវិញនៅត្រឹមដំណាច់ឆ្នាំ២០២២នេះ បន្ទាប់ពីមានកិច្ចព្រមព្រៀងរវាងក្រុមហ៊ុនយូ អេស ធី ត្រេឌីង ដែលជាក្រុមហ៊ុនផលិតកែច្នៃសំបកដបប្លាស្ទិកដំបូង និងឈានមុខគេក្នុងប្រទេសកម្ពុជា ជាមួយនឹងក្រុមហ៊ុនភេសជ្ជៈកម្ពុជា (កូកា-កូឡា)។ឯកឧត្តម ទឹង ស៊ីនី រដ្ឋលេខាធិការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានបង្ហាញការគាំទ្រចំពោះកិច្ចសហការរវាងក្រុមហ៊ុនទាំងពីរ ដោយបានចូលរួមធ្វើជាសាក្ខីភាពក្នុងពិធីចុះហត្ថលេខាលើអនុស្សរណៈ នៃការយោគយល់គ្នារវាងក្រុមហ៊ុនទាំងពីរ កាលពីរសៀលថ្ងៃទី១៩ ខែកញ្ញា ឆ្នាំ២០២២ ដើម្បីគាំទ្រការប្រមូល និងកែច្នៃដបប្លាស្ទិកPETឡើងវិញ ក្នុងប្រទេសកម្ពុជា។

លោក David Wigglesworth អគ្គនាយកប្រតិបត្តិនៃក្រុមហ៊ុន កូកា-កូឡា កម្ពុជា មានប្រសាសន៍ថា «ក្រុមហ៊ុន កូកា-កូឡា មានគោលដៅជាសកលដ៏មហិមាមួយ ក្នុងការប្រមូលដប ឬកំប៉ុងមកកែច្នៃឡើងវិញឱ្យបាន១០០ភាគរយ ស្មើនឹងចំនួនដប និងកំប៉ុងដែលយើងបានលក់ចេញត្រឹមឆ្នាំ២០៣០ ហើយនេះជាមូលហេតុនៃភាពជាដៃគូជាមួយ ក្រុមហ៊ុនយូ អេស ធី ត្រេឌីង ដើម្បីប្រមូល និងកែច្នៃដបប្លាស្ទិក PET ឆ្ពោះទៅរកពិភពលោកគ្មានសំរាម។ យើងជឿជាក់ថា ភាពជាដៃគូនេះ មិនត្រឹមតែជួយយើងឱ្យធ្វើការឆ្ពោះទៅរកគោលដៅចីរភាពរបស់យើងប៉ុណ្ណោះទេ ប៉ុន្តែថែមទាំងជំរុញអត្រាការប្រមូល និងកែច្នៃឡើងវិញនូវសំណល់ប្លាស្ទិករបស់កម្ពុជាផងដែរ»។ លោកបន្តថា កូកា-កូឡាកម្ពុជា បានគាំទ្រដល់កិច្ចខិតខំប្រឹងប្រែងក្នុងការប្រមែប្រមូល និងកែច្នៃឡើងវិញតាំងពីឆ្នាំ២០២០មកម្លេះ ដោយមកទល់ពេលនេះ ក្រុមហ៊ុន បានប្រមូល និងកែច្នៃដបប្លាស្ទិកបានចំនួន១.៤៥០0តោន ដើម្បីកែច្នៃទៅជាសម្ភារមានប្រយោជន៍ថ្មីមួយទៀត។

លោកស្រី ឆ គៀលី អគ្គនាយិកាប្រតិបត្តិនៃក្រុមហ៊ុន យូ អេស ធី ត្រេឌីង ក្នុងនាមជាក្រុមហ៊ុនផលិតដប បានបញ្ជាក់ជំហរលើការកែច្នៃដបប្លាស្ទិកឡើងវិញ ដោយលោកស្រី ថ្លែងថា «យើងតែងតែស្វែងរកការគាំទ្រពីអង្គការក្រៅរដ្ឋាភិបាល ក្រុមហ៊ុនឯកជន និងរាជរដ្ឋាភិបាល ដើម្បីរក្សាស្ថេរភាពវត្ថុធាតុដើម និងសម្រួលដល់ដំណើរការកែច្នៃឡើងវិញ ដើម្បីទទួលបានទិន្នផលផលិតផលកាន់តែប្រសើរ»។

កាលពីឆ្នាំ២០២០ ក្រុមហ៊ុន កូកា-កូឡា បានដាក់លក់ផលិតផលទឹក Dasani 350ml ដែលប្រើសំបកដបផលិតចេញពីវត្ថុធាតុដើមប្លាស្ទិក ដែលកែច្នៃឡើងវិញ(rPET) ១០០ភាគរយ ហើយកាលពីឆ្នាំមុន ក្រុមហ៊ុន កូកា-កូឡា បានដាក់ចេញសារ «កែច្នៃខ្ញុំឡើងវិញ» ដ៏លេចធ្លោ នៅលើសំបកដបវេចខ្ចប់ផលិតផលរបស់ខ្លួនក្នុងប្រទេសកម្ពុជា ហើយក៏បានប្តូរដប Sprite ពណ៌បៃតងទៅជាដបថ្លា ដើម្បីធ្វើឱ្យដបកាន់តែងាយស្រួល ក្នុងការកែច្នៃឡើងវិញ។ ជាមួយគ្នានេះ ក្រុមហ៊ុន ក៏បានជួយលើកកម្ពស់ការយល់ដឹងរបស់សហគមន៍លើការរៀបចំទុកដាក់កាកសំណល់ឱ្យបានត្រឹមត្រូវ និងកែច្នៃឡើងវិញ ដោយចាប់ដៃគូជាមួយអាជ្ញាធរ សាកលវិទ្យាល័យ និងអង្គការក្រៅរដ្ឋាភិបាល ដើម្បីដាក់ពង្រាយធុងបែងចែកសំរាមចំនួន១.០០០ធុង នៅតាមបណ្ដាសាលារៀន ផ្សារត្រី និងទីកន្លែងសាធារណៈជាង១២០កន្លែងនៅទូទាំងប្រទេស៕