បុរសជនជាតិជប៉ុនម្នាក់បានដុតខ្លួនឯង ដែលតាមសេចក្តីរាយការណ៍ គេសង្ស័យថា សកម្មភាពនេះធ្វើឡើងក្នុងគោលបំណងតវ៉ាជំទាស់ពិធីបុណ្យសពថ្នាក់ជាតិសម្រាប់អតីតនាយករដ្ឋមន្ត្រីជប៉ុន លោក ស៊ីនហ្សូ អាបេ ដែលត្រូវបានឃាតករលបធ្វើឃាត កាលពីខែកក្កដាកន្លងទៅ។ឥស្សរជនបរទេសរាប់រយនាក់ត្រូវបានគេរំពឹងថានឹងចូលរួមពិធីបុណ្យសពនៅថ្ងៃទី២៧ ខែកញ្ញាខាងមុខ។ កាលពីថ្ងៃពុធ សាក្សីបានហៅទូរស័ព្ទទៅប៉ូលិស បន្ទាប់ពីបានប្រទះឃើញបុរសម្នាក់ត្រូវភ្លើងឆេះនៅជិតការិយាល័យនាយករដ្ឋមន្ត្រីក្នុងទីក្រុងតូក្យូ។
ប្រព័ន្ធផ្សព្វផ្សាយក្នុងស្រុកបានរាយការណ៍ថា មន្រ្តីបានពន្លត់ភ្លើង ហើយបានយកបុរស ដែលនៅដឹងខ្លួនមានស្មារតី ទៅកាន់មន្ទីរពេទ្យ ហើយស្ថានភាពរងរបួសជាក់ស្ដែងនៅមិនទាន់ដឹងនៅឡើយទេ។ សារព័ត៌មានជប៉ុនរាយការណ៍ថា បុរសនោះប្រហែលជាស្ថិតក្នុងវ័យ៧០ឆ្នាំ។
រដ្ឋាភិបាលមិនទាន់ធ្វើអត្ថាធិប្បាយជុំវិញការតវ៉ានេះនៅឡើយទេ ប៉ុន្តែការប្រឆាំងជាសាធារណៈចំពោះការប្រារព្ធពិធីបុណ្យសពថ្នាក់ជាតិបានកើនឡើងកាន់តែខ្លាំងក្នុងរយៈពេលប៉ុន្មានខែថ្មីៗនេះ ដោយលទ្ធផលស្ទង់មតិបានបង្ហាញថា មនុស្សភាគច្រើនមិនសប្បាយចិត្តនឹងការចំណាយ។
គួរបញ្ជាក់រំលឹកផងដែរថា លោក អាបេ ត្រូវបានឃាតកបាញ់សម្លាប់កាលពីថ្ងៃទី៨ ខែកក្កដា ក្នុងអាយុ៦៧ឆ្នាំ ក្នុងពេលលោកកំពុងធ្វើយុទ្ធនាការស្វែងរកសម្លេងឆ្នោត។ ការសម្លាប់នាយករដ្ឋមន្ត្រីជប៉ុន ដែលកាន់អំណាចយូរជាងគេត្រូវបានថ្កោលទោសជាអន្តរជាតិ និងបានធ្វើឱ្យពិភពលោកមានការភ្ញាក់ផ្អើល ដោយសារជប៉ុនពុំសូវមានបញ្ហាហិង្សាផ្នែកនយោបាយ។ពិធីបុណ្យសពថ្នាក់ជាតិនេះមិនសូវប្រារព្ធនៅប្រទេសជប៉ុនជាញឹកញយឡើយ ហើយក្រុមអ្នកតវ៉ាបាននិយាយថា ពួកគេខកចិត្តចំពោះការប្រើប្រាស់មូលនិធិសាធារណៈនៅក្នុងព្រឹត្តិការណ៍នេះ ដែលទំនងជាចាយប្រាក់ ១១.៤ លានដុល្លារ៕
