ប្រធានាធិបតីហ្វីលីពីន Ferdinand Marcos Jr.បានសង្កត់ធ្ងន់ថាការទាមទារទឹកដីដែលមានជម្លោះនៅក្នុងសមុទ្រចិនខាងត្បូង គួរតែត្រូវបានដោះស្រាយតាមរយៈការសន្ទនា។
លោក Marcos បានធ្វើការកត់សម្គាល់នេះក្នុងអំឡុងពេលថ្លែងសុន្ទរកថាទៅកាន់មហាសន្និបាតអង្គការសហប្រជាជាតិកាលពីថ្ងៃអង្គារ ដែលជាថ្ងៃដំបូងនៃកិច្ចពិភាក្សាទូទៅ។ នេះជាការបង្ហាញខ្លួនលើកដំបូងរបស់លោក Marcos ក្នុងសន្និសីទអន្តរជាតិចាប់តាំងពីលោកចូលកាន់តំណែងក្នុងខែមិថុនា។
ដោយសំដៅលើប្រទេសចិន លោកប្រធានាធិបតីបាននិយាយថា៖«ភាពខុសគ្នាគួរតែត្រូវបានដោះស្រាយតាមរយៈមធ្យោបាយសន្តិភាពតែប៉ុណ្ណោះ»។លោកបានបន្ថែមថា៖«តាមរយៈការពង្រឹងការព្យាករណ៍និងស្ថិរភាពនៃច្បាប់អន្តរជាតិជាពិសេសអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ1982 យើងបានផ្តល់នូវឧទាហរណ៍មួយអំពីរបៀបដែលរដ្ឋគួរតែដោះស្រាយភាពខុសគ្នារបស់ពួកគេគឺតាមរយៈហេតុផល និងដោយត្រឹមត្រូវ»។
អនុសញ្ញានេះគឺជាមូលដ្ឋានសម្រាប់សេចក្តីសម្រេចរបស់តុលាការមជ្ឈត្តកម្មអន្តរជាតិក្នុងឆ្នាំ 2016 ដែលបានច្រានចោលទាំងស្រុងនូវការទាមទាររបស់ចិនចំពោះសិទ្ធិជាប្រវត្តិសាស្ត្រនៅសមុទ្រចិនខាងត្បូង។លោក Marcos ក៏បានសម្តែងការព្រួយបារម្ភផងដែរថា ការប្រេះឆារវាងសហរដ្ឋអាមេរិក និងចិនអាចកាន់តែស៊ីជម្រៅលើបញ្ហាសមុទ្រចិនខាងត្បូងនិងកោះតៃវ៉ាន់។លោកបាននិយាយថា៖«នៅអាស៊ី សន្តិភាព និងស្ថិរភាពដែលពិបាកទទួលបានរបស់យើងគឺស្ថិតនៅក្រោមការគំរាមកំហែងដោយការបង្កើនភាពតានតឹងផ្នែកយុទ្ធសាស្ត្រ និងមនោគមវិជ្ជា»៕
