នាវាចម្បាំងអាមេរិកនិងកាណាដាធ្វើដំណើររួមគ្នាឆ្លងកាត់ច្រកសមុទ្រតៃវ៉ាន់

សហរដ្ឋអាមេរិកនិយាយថា អាមេរិកនិងកាណាដាបានបញ្ជូននាវាចម្បាំងរបស់ពួកគេទៅឆ្លងកាត់ច្រកសមុទ្រតៃវ៉ាន់។
កងនាវាចរទីប្រាំពីររបស់កងទ័ពជើងទឹកអាមេរិកបានប្រកាសនៅក្នុងសេចក្តីថ្លែងការណ៍មួយថានាវាពិឃាតអាមេរិកHiggins និងនាវាចម្បាំង Vancouver របស់កងទ័ពជើងទឹកកាណាដាបានបើកឆ្លងកាត់ដែនទឹកកាលពីថ្ងៃអង្គារ។

សេចក្តីថ្លែងការណ៍បាននិយាយថា៖នាវាទាំងពីរបានឆ្លងកាត់ច្រករបៀងមួយនៅក្នុងច្រកសមុទ្រអន្តរជាតិ»។សេចក្ដីថ្លែងការណ៍ខាងលើបន្ថែមថា សកម្មភាពនេះបង្ហាញពីការប្តេជ្ញាចិត្តរបស់សហរដ្ឋអាមេរិក សម្ព័ន្ធមិត្ត និងដៃគូរបស់ខ្លួនចំពោះតំបន់ឥណ្ឌូប៉ាស៊ីហ្វិកសេរីនិងបើកចំហ។

អ្នកនាំពាក្យមន្ទីរបញ្ចកោណលោក Patrick Ryder បានថ្លែងទៅកាន់អ្នកសារព័ត៌មានកាលពីថ្ងៃអង្គារថា៖«ដូចសព្វមួយដង យោធាអាមេរិកនឹងបន្តហោះហើរ ធ្វើនាវាចរ និងប្រតិបត្តិការនៅតំបន់ដែលច្បាប់អន្តរជាតិអនុញ្ញាត»។

សកម្មភាពទ័ពជើងទឹកនេះត្រូវបានគេមើលឃើញថាជាការបង្ហាញពីការប្តេជ្ញាចិត្តរបស់សហរដ្ឋអាមេរិក និងសម្ព័ន្ធមិត្តរបស់ខ្លួនចំពោះកោះតៃវ៉ាន់ហើយកើតឡើងចំពេលមានការកើនឡើងសម្ពាធយោធាពីទីក្រុងប៉េកាំង។
គូសបញ្ជាក់ថាប្រទេសចិនបានធ្វើសមយុទ្ធយោធាទ្រង់ទ្រាយធំនៅជិតកោះតៃវ៉ាន់បន្ទាប់ពីដំណើរទស្ស នកិច្ចរបស់ប្រធានសភាអាមេរិកNancy Pelosiទៅកាន់កោះតៃវ៉ាន់កាលពីខែសីហា៕