ខុទ្ទកាល័យរបស់លោក Yair Lapid នាយករដ្ឋមន្ត្រីអ៊ីស្រាអែល បានបញ្ជាក់ថា មេដឹកនាំប្រទេស លោក Yair Lapid និងប្រធានាធិបតីតួកគី លោក Tayyip Erdogan បានជួបពិភាក្សាគ្នាក្នុងអំឡុងពេលចូលរួមមហាសន្និបាតអង្គការសហប្រជាជាតិកាលពីថ្ងៃអង្គារ ដែលនេះជាកិច្ចពិភាក្សាទល់មុខគ្នាជាលើកដំបូងរវាងមេដឹកនាំទាំងពីរចាប់តាំងឆ្នាំ២០០៨មក។
ទំនាក់ទំនងរវាងអ៊ីស្រាអែលនិងតួកគី ដែលមានភាពល្អក់កករ បានប្រែមកស្រស់ថ្លាវិញក្នុងប៉ុន្មានខែថ្មីៗនេះ ដោយទំនងជាហុចផលលើវិស័យថាមពល ដែលកើតចេញពីកិច្ចសហប្រតិបត្តិការរវាងប្រទេសទាំងពីរ។ ឯកអគ្គរដ្ឋទូតថ្មីត្រូវបានគេរំពឹងថានឹងផ្លាស់ប្តូរក្នុងពេលឆាប់ៗនេះ។
ខុទ្ទកាល័យរបស់នាយករដ្ឋមន្ត្រីអ៊ីស្រាអែលបានបន្ថែមថា លោក Lapid បានថ្លែងអំណរគុណដល់លោក Erdogan សម្រាប់ការចែករំលែកព័ត៌មានសម្ងាត់របស់ប្រទេស ហើយបានកត់សម្គាល់ពីតម្រូវការរបស់អ៊ីស្រាអែលសម្រាប់ការវិលត្រឡប់របស់ពលរដ្ឋរបស់ខ្លួនចំនួន៤នាក់ ដែលក្នុងនោះមានទាហាន២នាក់ដែលបានបាត់ខ្លួននៅតំបន់ហ្គាហ្សាស្ទ្រីបចាប់តាំងពីសង្រ្គាមឆ្នាំ២០១៤កន្លងមក។
ប្រទេសតួកគី ដែលជាសមាជិករបស់អង្គការណាតូ បាននិងកំពុងធ្វើជាម្ចាស់ផ្ទះសមាជិកក្រុមហាម៉ាសដែលជាចលនាអ៊ីស្លាមនិយមប៉ាឡេស្ទីនដែលគ្រប់គ្រងតំបន់ហ្គាហ្សា និងដែលភាគច្រើននៃលោកខាងលិចចាត់ទុកជាក្រុមភេរវករ។ ទំនាក់ទំនងនេះបានបន្ទុចបង្អាក់ការកសាងទំនាក់ទំនងអ៊ីស្រាអែលឡើងវិញ។ដោយឡែក ទីក្រុងអង់ការ៉ាមានការខឹងសម្បារចំពោះការសម្លាប់សកម្មជនតួកគីចំនួន១០នាក់ក្នុងឆ្នាំ២០១០ នៅក្នុងការប៉ះទង្គិចគ្នាដែលបានផ្ទុះឡើង៕
