ភ្នំពេញ៖ រយៈពេល ៣ថ្ងៃ នៃការប្រារព្ធពិធីបុណ្យភ្ជុំបិណ្ឌនាឆ្នាំ២០២២ នេះ គ្រោះថ្នាក់ចរាចរណ៍នៅទូទាំងប្រទេសបានកើតឡើងសរុបចំនួន ៣៤ករណី ដោយសារការបំពាននឹងល្បឿនកំណត់ និងបើកបរគ្មានការអធ្យាស្រ័យគ្នាទៅវិញទៅមក។
ចំណោមនោះចំនួនអ្នកស្លាប់មានចំនួន ២៧នាក់ ដែលចំនួននេះបានបង្ហាញអំពីការកើនឡើងជាងពាក់កណ្ដាល បើប្រៀបធៀបនឹងរយៈពេលដូចគ្នាកាលពីឆ្នាំ២០២១។
ផ្អែកតាមរបាយការណ៍របស់អគ្គស្នងការនគរបាលជាតិបានបញ្ជាក់ថា គិតចាប់ពីថ្ងៃទី២៤ រហូតដល់ថ្ងៃទី២៦ ខែកញ្ញា ឆ្នាំ២០២២ ក្នុងអំឡុងពេលបុណ្យភ្ជុំបិណ្ឌ គ្រោះថ្នាក់ចរាចរណ៍នៅទូទាំងប្រទេសកម្ពុជាបានកើតឡើងសរុបចំនួន ៣៤ករណី ដោយមានអ្នកស្លាប់ និងរងរបួសសរុបចំនួន ៨៤នាក់ ក្នុងនោះអ្នកស្លាប់ចំនួន ២៧នាក់ រងរបួសធ្ងន់សរុប ៣៤នាក់ និងអ្នករងរបួសស្រាលមានចំនួន ២៣នាក់។ សូមបញ្ជាក់ថាក្នុងអំឡុងពិធីបុណ្យភ្ជុំបិណ្ឌកាលពីឆ្នាំ២០២១ មានករណីគ្រោះថ្នាក់ចរាចរណ៍សរុប ៣៥ករណី ដែលបណ្ដាលឱ្យមានមនុស្សស្លាប់ចំនួន ១៤នាក់ និងរបួសធ្ងន់ស្រាលចំនួន ៦៤នាក់៕
