ភ្នំពេញ៖ បច្ចុប្បន្នក្រុមការងារនៃនាយដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ ជាក្រុមមន្ត្រីជំនាញរបស់អជ្ញាធរជាតិអប្សរាកំពុងខិតខំប្រឹងប្រែងរំដោះទឹកចេញពីតំបន់ប្រាសាទបុរាណមួយចំនួនតាមរយៈទ្វារទឹកនានា ដើម្បីបង្ការកុំឱ្យមានការជន់លិចប្រាសាទ។
ផ្អែកតាមការផ្សព្វផ្សាយព័ត៌មានរបស់អជ្ញាធរជាតិអប្សរានាថ្ងៃទី២៨ ខែកញ្ញា ឆ្នាំ២០២២ បានបញ្ជាក់ថា ឥទ្ធិពលនៃព្យុះ ណូរុ ពីប្រទេសហ្វីលីពីន បានធ្វើឱ្យប្រទេសកម្ពុជារងសម្ពាធទាប និងមានភ្លៀងធ្លាក់ជាបន្តបន្ទាប់ចាប់ពីពាក់កណ្ដាលខែ កញ្ញា រហូតមកដល់បច្ចុប្បន្ន។ ស្ថានភាពអាកាសធាតុបែបនេះ បានធ្វើឱ្យមានភ្លៀងធ្លាក់ច្រើនដង ហើយបណ្ដាលឱ្យស្រុកមួយចំនួននៃខេត្តសៀមរាបមានការជន់លិច។ នៅតំបន់រមណីយដ្ឋានអង្គរ ទឹកភ្លៀងច្រើនសន្ធឹកសន្ធាប់ត្រូវបានប្រមូលទុក និងខ្លះក៏ត្រូវបានរំដោះចេញផងដែរ ដោយសារបរិមាណច្រើនហួសកម្រិត។ របាយការណ៍សង្ខេបពីនាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរាបានបញ្ជាក់ថា ក្រុមការងារបានរំដោះទឹកនៅតាមតំបន់ប្រាសាទមួយចំនួនដូចជា ប្រាសាទអង្គរវត្ត ព្រះខ័ន តាព្រហ្ម និងបាយ័ន្តជាដើម។ មន្ត្រីជំនាញបានរំដោះទឹក ដោយបញ្ជៀសទឹកចេញតាមប្រព័ន្ធប្រឡាយបុរាណបង្ហូរទៅតាមស្ទឹងនានា ដូចជាស្ទឹងសៀមរាប ស្ទឹងរលួស ស្ទឹងពួក និងស្ទឹងព្រះស្រុក ដើម្បីបន្ថយផលប៉ះពាល់បែបអវិជ្ជមានដល់តំបន់ប្រាសាទបុរាណ និងក្រុងសៀមរាប។
បន្ថែមលើនេះក្រុមការងារអជ្ញាធរជាតិអប្សរាក៏បានប្រមូលទឹក ដើម្បីបំពេញក្នុងប្រព័ន្ធគ្រប់គ្រងបុរាណ ដើម្បីធានាដល់តុល្យភាពនៃការប្រើប្រាស់ទឹកក្នុងតំបន់អង្គរផងដែរ។ ប្រព័ន្ធគ្រប់គ្រងទឹកពីបុរាណទាំងនោះមានដូចជា បារាយណ៍ខាងលិច បារាយណ៍ខាងជើង កសិន្ធុអង្គរធំ កសិន្ធុអង្គរវត្ត ស្រះស្រង់ និងកសិន្ធព្រះខ័នជាដើម។ បើតាមរបាយការរបស់រដ្ឋបាលខេត្តសៀមរាបបានបង្ហាញថា ចាប់ពីថ្ងៃទី១៧ ដល់ថ្ងៃទី២៤ កញ្ញា ឆ្នាំ២០២២ នេះ ជំនន់ទឹកភ្លៀងដែលហូរចេញពីខេត្តឧត្តរមានជ័យ និងខេត្តព្រះវិហារបានបង្ករឱ្យមានការលិចលង់នៅក្នុងស្រុកចំនួន៩ នៃខេត្តសៀមរាប។
ពលរដ្ឋខេត្តសៀមរាបដែលកំពុងរងគ្រោះដោយសារគ្រោះមហន្តរាយនេះមានចំនួនសរុប ៨,៤៤៤គ្រួសារ រស់នៅក្នុងភូមិចំនួន ២៤៥ នៃឃុំចំនួន៥៦ ក្នុងស្រុកទាំង៩ ដែលបានជួបបញ្ហា។ ស្រុកទាំង ៩ កំពុងរងគ្រោះពីជំនន់ទឹកភ្លៀងនោះរួមមាន ស្រុកស្រីស្នំ ក្រឡាញ់ ជីក្រែង អង្គរជុំ វ៉ារិន ពួក សូទ្រនិគម ប្រាសាទបាគង និងអង្គរធំ៕
