ប្រធានាធិបតីអ៊ីរ៉ង់និយាយថាក្រុមកុបករនឹងទទួលខុសត្រូវចំពោះភាពចលាចល

ប្រធានាធិបតីអ៊ីរ៉ង់លោក Ebrahim Raisi បានសង្កត់ធ្ងន់លើចេតនារបស់គាត់ក្នុងការបង្រ្កាបយ៉ាងតឹងរ៉ឹងលើក្រុមបាតុករដែលគាត់អះអាងថាបានឆ្លងបន្ទាត់ក្រហមដោយកុប្បកម្ម។

លោកRaisi បានធ្វើការកត់សម្គាល់យ៉ាងដូច្នេះនៅក្នុងបទសម្ភាសន៍ជាមួយទូរទស្សន៍រដ្ឋកាលពីថ្ងៃពុធ ខណៈដែលភាពចលាចលទូទាំងប្រទេសនៅតែបន្ត បន្ទាប់ពីការស្លាប់របស់នាង Mahsa Amini វ័យ 22 ឆ្នាំកាលពីថ្ងៃទី16ខែកញ្ញា។

នាងAmini ត្រូវបានចាប់ខ្លួនដោយប៉ូលិសសីលធម៌។អាជ្ញាធរបាននិយាយថា នាងបានស្លាប់ដោយសារជំងឺគាំងបេះដូង ប៉ុន្តែក្រុមអ្នកតវ៉ាជឿថានាងត្រូវបានប៉ូលិសធ្វើទារុណកម្មលើរាងកាយ។នៅក្នុងបទសម្ភាសន៍ លោកRaisi បាននិយាយថានឹងមានរបាយការណ៍ធ្វើកោសល្យវិច្ច័យអំពីការស្លាប់របស់នាងនៅប៉ុន្មានថ្ងៃខាងមុខនេះ។

លោកប្រធានាធិបតី បាននិយាយថាបន្ទាត់ក្រហមរបស់រដ្ឋាភិបាលគឺជាសន្តិសុខសាធារណៈដោយបន្ថែមថាខ្លួនមិនអាចអនុញ្ញាតឱ្យនណាម្នាក់”រំខានដល់សន្តិភាពនៃសង្គមតាមរយៈកុបកម្មឡើយ”។

លោកបានព្រមានថា អ្នកដែលបានចូលរួម ឬបញ្ឆេះ«ភាពចលាចល និងកុប្បកម្ម» នឹងត្រូវទទួលខុសត្រូវ ខណៈលោកកត់សម្គាល់ថា «គ្មាននរណាម្នាក់រងការគំរាមកំហែងក្នុងការបញ្ចេញទស្សនៈរបស់ខ្លួនឡើយ»។បើតាមសារព័ត៌មានរដ្ឋអ៊ីរ៉ង់ បានឱ្យដឹងថាមនុស្សយ៉ាងហោចណាស់៤១ នាក់បានស្លាប់នៅក្នុងការប៉ះទង្គិចគ្នារវាងក្រុមបាតុករ និងកងកម្លាំងសន្តិសុខខណៈមនុស្សរាប់រយផ្សេងទៀតត្រូវបានចាប់ខ្លួន៕