មហាសេដ្ឋី Elon Musk បានបង្ហាញគំរូមនុស្សយន្ដឈ្មោះ ‘Optimus’ ដែលមានទ្រង់ទ្រាយដូចជាមនុស្សនៅឯកម្មវិធី AI Day របស់ក្រុមហ៊ុន Tesla ហើយមហាសេដ្ឋីរូបនេះបានព្យាករថា ក្រុមហ៊ុនអាចផលិតមនុស្សយន្ដបានរាប់លានគ្រឿងនិងអាចលក់ចេញក្នុងតម្លៃមួយភាគបីនៃឡាន Tesla ម៉ូដែល Y SUV។
លោក Elon Musk បាននិយាយថា៖ “គោលដៅរបស់យើងគឺបង្កើតមនុស្សយន្តដែលមានប្រយោជន៍ ឱ្យបានលឿនតាមដែលអាចធ្វើទៅបាន ហើយយើងក៏បានរចនាវាដោយប្រើប្រាស់គោលគំនិតដូចការរចនារថយន្ដដែរ ពោលគឺអាចផលិតបានក្នុងបរិមាណច្រើន តម្លៃទាបជាមួយនឹងការទទួលខុសត្រូវខ្ពស់ ”។
លោកបានបន្ដថា៖ “Optimus ត្រូវបានរចនាឡើងជាមនុស្សយន្តដែលមានសមត្ថភាពខ្លាំងបំផុត ហើយផលិតក្នុងបរិមាណខ្ពស់ ជាមួយនឹងតម្លៃប្រហែលក្រោម២ម៉ឺនដុល្លារ។ នេះជាការប៉ាន់ប្រមាណរបស់ខ្ញុំ”។លោក Musk បានរំពឹងថា ក្រុមហ៊ុន Tesla នឹងត្រៀមខ្លួនរួចជាស្រេចក្នុងការទទួលបញ្ជាទិញមនុស្សយន្តក្នុងរយៈពេលពី ៣ ទៅ ៥ ឆ្នាំខាងមុខ ប៉ុន្តែនៅមានការងារជាច្រើនបន្ថែមទៀត ដែលត្រូវធ្វើ។លោកបានសង្កត់ធ្ងន់ថា មនុស្សយន្ដនៅខ្វះខួរក្បាល ដែលកិច្ចការនេះក្រុមហ៊ុនតែខិតខំប្រឹងប្រែងធ្វើក្នុងរយៈពេលជាង១ទសវត្សមកហើយ។
គួរបញ្ជាក់ផងដែរថា មហាសេដ្ឋី Elon Musk ដែលធ្លាប់បានលើកឡើងពីហានិភ័យនៃបញ្ញាសិប្បនិមិត្ត បាននិយាយថា ការបញ្ចេញមនុស្សយន្ដក្នុងទ្រង់ទ្រាយធំមានសក្តានុពលក្នុងការ “ផ្លាស់ប្តូរអារ្យធម៌”។ការជំរុញរបស់ក្រុមហ៊ុន Tesla ក្នុងការរចនានិងបង្កើតមនុស្សយន្តនេះ ក៏មានការដាក់សាកល្បងឱ្យមនុស្សយន្តធ្វើការក្នុងរោងចក្រផងដែរ ដែលកត្តានេះបានធ្វើឱ្យមនុស្សយន្ដរបស់មហាសេដ្ឋីរូបនេះខុសប្លែកពីផលិតផលក្រុមហ៊ុនផ្សេងដែលមានពិសោធន៍ជាមួយមនុស្សយន្ត៕
