ម៉ឹង កុសល (០៤ ១០ ២២)
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានលើកឡើងថា ការប្រកួតកីឡា ដើម្បីយកពានរង្វាន់ ឬមេដាយអ្វីមួយនោះ គឺជាកត្តាសំខាន់មួយ តែកត្តាសំខាន់មួយទៀតនោះ គឺសីលធម៌កីឡា ។ ការលើកឡើងរបស់សម្ដេចតេជោ ហ៊ុន សែននេះ បានធ្វើឡើងក្នុងជំនួបពិភាក្សាជាមួយ លោក Raja Randhir Singh ប្រធានស្តីទីក្រុមប្រឹក្សាអូឡាំពិកអាស៊ី នាព្រឹកថ្ងៃទី៤ ខែតុលា ឆ្នាំ២០២២នេះ នៅសណ្ឋាគារសុខាភ្នំពេញ។
នៅក្នុងជំនួបនេះលោក Raja Randhir Singh បានគោរពជម្រាបជូនសម្ដេចតេជោថា លោកពិតជាមានកិត្តិយសណាស់ ដែលដឹកនាំគណៈប្រតិភូមកចូលរួមក្នុងមហាសន្និបាតក្រុមប្រឹក្សាអូឡាំពិកអាស៊ីលើកទី៤១ នៅក្នុងប្រទេសកម្ពុជានាពេលនេះ។ លោក Singh បានគោរព និងវាយតម្លៃខ្ពស់ចំពោះការដឹកនាំរបស់សម្ដេចតេជោ ដែលធ្វើឲ្យប្រទេសកម្ពុជាមានការអភិវឌ្ឍរីកចម្រើន ជាពិសេសការបង្កើតឲ្យមានកីឡដ្ឋានជាតិដ៏ល្អ សម្រាប់ការប្រកួតកីឡាស៊ីហ្គេម នាពេលខាងមុខ។ លោកប្រធានស្តីទីក្រុមប្រឹក្សាអូឡាំពិកអាស៊ី បានបន្តថា លោកមានជំនឿយ៉ាងមុតមាំ លើសមត្ថភាពរបស់កម្ពុជា ក្នុងការរៀបចំការប្រកួតកីឡាស៊ីហ្គេមនាពេលខាងមុខ ឲ្យទទួលបានជោគជ័យ។
ជាការឆ្លើយតបសម្ដេចតេជោ ហ៊ុន សែន បានស្វាគមន៍គណៈប្រតិភូរបស់លោក Raja Randhir Singh ហើយសម្ដេចកត់សម្គាល់ថា នៅតំបន់អាស៊ី ទោះបីជាមានប្រជាជនច្រើន តែក៏មិនប្រាកដថា មានកីឡាករពូកែៗ សម្រាប់ការប្រកួតពានរង្វាន់អូឡាំពិកពិភពលោកនៅឡើយទេ។ នៅក្នុងជំនួបនេះ សម្ដេចតេជោ ហ៊ុន សែន បានលើកឡើងថា ការប្រកួតកីឡាយកពានរង្វាន់ ឬមេដាយ ជាកត្តាមួយ តែកត្តាមួយទៀតដែលសំខាន់ដែរនោះ គឺសីលធម៌កីឡា។ ក្នុងន័យនេះ សម្ដេចតេជោ បានផ្ដល់អនុសាសន៍ឲ្យមានការពិភាក្សា និងការប្រកាន់ខ្ជាប់ក្នុងការគោរពសីលធម៌កីឡា នៅពេលប្រកួត៕
