មេដឹកនាំកំពូលរបស់អ៊ីរ៉ង់បានចោទប្រកាន់សហរដ្ឋអាមេរិក និងអ៊ីស្រាអែលថាជាមេក្លោងការតវ៉ាដែលបង្កឡើងដោយការស្លាប់របស់នារីម្នាក់ដែលត្រូវបានប៉ូលិសសីលធម៌ចាប់ឃុំខ្លួន។នៅក្នុងសុន្ទរកថាមួយកាលពីថ្ងៃចន្ទ លោក Ayatollah Ali Khamenei បានទម្លាយភាពស្ងៀមស្ងាត់របស់គាត់លើការតវ៉ាជាបន្តបន្ទាប់ ដែលបានចាប់ផ្តើមបន្ទាប់ពីនាង Mahsa Amini អាយុ 22 ឆ្នាំបានស្លាប់កាលពីខែមុន ខណៈពេលកំពុងជាប់ឃុំ។ ក្រុមបាតុករជឿថានាងត្រូវបានប៉ូលិសធ្វើទារុញកម្ម។
លោក Khamenei បាននិយាយថា គាត់សោកស្ដាយចំពោះការស្លាប់របស់នាង។ ប៉ុន្តែលោកបានពណ៌នាទិដ្ឋភាពនៃក្រុមបាតុករដុតធនាគារនិងរថយន្តថាមិនមែនការតវ៉ាធម្មតានោះទេ។ លោកអះអាងថា ភាពចលាចលនេះត្រូវបានរៀបចំដោយអាមេរិក និងអ៊ីស្រាអែល។លោក Khamenei បានសម្តែងការគាំទ្រចំពោះការបង្រ្កាបរបស់អាជ្ញាធរតុលាការលើបាតុករ។ លោកថា អ្នកណាដែលបង្កជម្លោះត្រូវទទួលទោសតាមច្បាប់។
ភាពចលាចលចុងក្រោយបំផុតត្រូវបានបង្ករឡើងដោយការប៉ះទង្គិចគ្នារវាងក្រុមបាតុករ និងកងកម្លាំងសន្តិសុខ ដែលភាគច្រើននៅតាមបរិវេណសាកលវិទ្យាល័យនៅទូទាំងប្រទេស។ប្រព័ន្ធផ្សព្វផ្សាយរដ្ឋបាននិយាយថា មនុស្ស៤១នាក់បានស្លាប់រហូតមកដល់ពេលនេះ។ សកម្មជនសិទ្ធិមនុស្សនិយាយថាតួលេខនេះបង្ហាញពីចំនួនអ្នកស្លាប់ពិតប្រាកដកើនឡើង។ អ្នកសង្កេតការណ៍បារម្ភថា ការបង្ក្រាបបន្ថែមទៀតអាចបណ្តាលឲ្យមានអ្នកស្លាប់និងរបួសច្រើនជាងនេះ៕
