ដោយ រតនា
ភ្នំពេញ៖ រថយន្តបើកបរ ក្នុងល្បឿនលឿនខ្វះការប្រុងប្រយ័ត្នបុកម៉ូតូយ៉ាងពេញទំហឹងបណ្ដាលឱ្យបុរសពីរនាក់បានស្លាប់ រួចរត់គេចខ្លួនពីកន្លែងកើតហេតុត្រូវបានសមត្ថកិច្ចរកឃើញ រថយន្តប្លុង់ចោល តាមបណ្ដោយផ្លូវលេខ២៧៨ កែវផ្លូវលេខ១៥៧ មូលដ្ឋានសង្កាត់អូឡាំពិក ខណ្ឌបឹងកេងកង នៅជាប់របងវត្តមហាមន្ត្រី ពេលនេះសមត្ថកិច្ចបានស្ទូចយករថយន្តទៅរក្សាទុកនៅស្នងការដ្ឋាននគរបាលរាជធានីភ្នំពេញដើម្បីស្រាវជ្រាវរកម្ចាស់យកមកតាមទារទោសតាមផ្លូវច្បាប់។ជនរងគ្រោះដែលបានស្លាប់ទាំង២នាក់ ទី១ មានឈ្មោះ ជួន ច័ន្ទសុផារ៉ា ភេទប្រុស អាយុ២៣ឆ្នាំ ជនជាតិខ្មែរ មុខរបរមន្រ្តី នគរបាលជាតិ ឋានន្តរស័ក្តិ ព្រិន្ទបាលទោ មានស្រុកកំណើតនៅភូមិក្រាំងបន្ទាយ ឃុំបន្ទាយមាសខាងលិច ស្រុកបន្ទាយមាស ខេត្តកំពត។ ទី២ មានឈ្មោះ ម៉ុក ចិន្តា ភេទប្រុស អាយុ៣៥ឆ្នាំ ជនជាតិខ្មែរ មុខរបរជាងកាត់សក់រស់នៅភូមិកម្មករ សង្កាត់ទឹកថ្លា ខណ្ឌសែនសុខរាជធានីភ្នំពេញ។
គួរបញ្ជាក់ផងដែរ កាលពីវេលាម៉ោង៣និង២០នាទីទៀបភ្លឺ ថ្ងៃទី៧ ខែតុលា ឆ្នាំ២០២២ ស្លាប់ម្នាក់ របួសធ្ងន់ធ្ងរម្នាក់ ចំណែកម៉ូតូមួយគ្រឿងដាច់ជាពីរកំណាត់ ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់ កើតឡើងដោយ រថយន្ត Mercedes Maybach សេរីទំនើប បុកម៉ូតូស្កូបពី យ៉ាងពេញទំហឹង រួចបើករត់គេចខ្លួនពីកន្លែងកើតហេតុ ស្ថិតនៅតាមបណ្តោយផ្លូវ២១៥ កែងផ្លូវ១៨២ ចំណុចស្តុបផ្សារដេប៉ូ ក្នុងសង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញម៉ូតូមួយគ្រឿង ម៉ាកស្កូបពី ពណ៌ស ពាក់ស្លាកលេខ ភ្នំពេញ1BN-0345 ជិះដោយបុរស២នាក់ ធ្វើដំណើរតាមបណ្តោយផ្លូវលេខ១៨២ ក្នុងទិសដៅពីកើតទៅលិច ខណៈមកដល់ចំណុចកើតហេតុ ស្រាប់តែត្រូវរថយន្តមួយគ្រឿង ម៉ាក Mercedes Maybach ពណ៌ខ្មៅ ស្លាកលេខភ្នំពេញ2BF-8898 បើកបរដោយបុរសបរទេសម្នាក់ ធ្វើដំណើរតាមបណ្តោយផ្លូវលេខ២១៥ ទិសដៅពីជើងទៅត្បូង ក្នុងល្បឿនលឿនដូចហោះ បុកពេញទំហឹងទៅលើម៉ូតូ បណ្តាលឲ្យមនុស្ស២នាក់ខ្ទាត បាក់ដៃបាក់ជើង រងរបួសធ្ងន់ធ្ងរម្នាក់ និងស្លាប់ម្នាក់។
ក្រោយពេលកើតហេតុ គេឃើញមានរថយន្តសាម៉ុយរបស់មន្ទីរពេទ្យបង្អែករាជធានីភ្នំពេញ បានមកដល់ទីតាំងកើតហេតុ និងបានបញ្ជូនអ្នករបួសទៅកាន់មន្ទីរពេទ្យដើម្បីសង្គ្រោះបន្ទាន់ភ្លាមៗដែរ តែជាអកុសលពេលដល់មន្ទីរពេទ្យ ជនរងគ្រោះបានស្លាប់បាត់បង់ជីវិត។បច្ចុប្បន្នសពទាំង២នាក់ត្រូវបានសាច់ញាតិទទួលយកទៅធ្វើបុណ្យតាមប្រពៃណី។ ចំណែកវត្ថុតាងទាំង២ត្រូវបានសមត្ថកិច្ចនាំយកទៅរក្សារទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ៕
