ដោយ រតនា
ភ្នំពេញ៖ កម្លាំងគណៈបញ្ជាការឯកភាពខណ្ឌចំការមន បានចុះឆ្មុកបង្ក្រាប់ទីតាំង អ៉ីធើណែត អនឡាញ មានបង្កប់ល្បែងស៉ីសងភ្នាល់បាល់ បាក្រាត មួយកន្លែង ត្រូវបានកម្លាងអាជ្ញាធរឃាត់ខ្លួនមនុស្ស២នាក់ និងដកហូតវត្ថុតាងមួយចំនួនដែលជាសម្ភារៈសម្រាប់ចាក់ភ្នាល់។
ប្រតិបត្តិការនេះ ធ្វើឡើងនៅវេលា០៩ និង៣០យប់ថ្ងៃអាទិត្យ ទី០៩ ខែតុលា ឆ្នាំ២០២២ ដឹកនាំដោយលោក កៀង ល័ក្ស អភិបាល នៃគណៈអភិបាលខណ្ឌចំការមន មានការសម្របសម្រួលពីលោក ទុង រតនា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ដឹកនាំកម្លាំងគណៈបញ្ជាការឯកភាពរដ្ឋបាលខណ្ឌចំការមន បានចុះត្រួតពិនិត្យទីតាំងសេវាអនឡាញ AA2888.Net ដែលស្ថិតនៅផ្ទះលេខ៥៩ ផ្លូវលេខ៤៣២ ភូមិ៤ សង្កាត់ទួលទំពូងទី២ ខណ្ឌចំការមន ររាជធានីភ្នំពេញ។
តាមប្រភពព័ត៌មានពីមន្រ្តីអាជ្ញាធរបានឲ្យដឹងថា មុនឈានដល់ការចុះបង្ក្រាប់ទីតាំង មានការផ្ដល់ព័ត៌មាន យ៉ាងច្បាស់ការថាទីតាំងនេះ នៅបន្តលួចលាក់បំរើសេវា អនឡាញ បង្កប់ល្បែងស៉ីសង ដោយផ្គើននិងប្រសាសន៍ របស់ថ្នាក់ដឹកនាំ។ ដូច្នេះកម្លាំងអាជ្ញាធរខណ្ឌចំការមន បានឆ្មុកចុះដល់ទីតាំងនេះបានពិនិត្យឃេីញថា ទីតាំង មានទទួលភ្នាល់លេងល្បែងស៊ីសង (បាក្រាត, ភ្នាល់ចាក់បាល់…) គ្រប់ប្រភេទ ដដែលមានសម្ភារៈបម្រេីសេវាអន់ឡាញខុសច្បាប់។
ក្រោយប្រតិបត្តិការកម្លាំងអាជ្ញាធរបានធ្វើការដកហូត សម្ភារៈ រួមមានៈ កុំព្យូទ័រ ០១ឈុត , លុយខ្មែរ ជិត៣លានរៀល , លុយដុល្លារ ជាង១០០០ដុល្លារ និងឃាត់មនុស្សជាបុគ្គលិកចំនួន ០២នាក់ ប្រគល់ទៅអោយប៉ុស្ដិ៍នគរបាលរដ្ឋបាលទួលទំពូងទី២ ដេីម្បីអនុវត្តនីតិវិធីបន្តតាមផ្លូវច្បាប់ ។ ចំណែកទីតាំងអាជ្ញាធរសម្រេចផ្អាកអាជីវកម្ម និងបិទទ្វារឃ្លុំបេទីតាំងជាបណ្ដោះអាសន្ន៕
