ម៉ឹង កុសលុ ( ២០ ១០ ២០២២)
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងអំណរគុណដល់គ្រឹះស្ថាន មីក្រូហិរញ្ញាវត្ថុទាំងអស់ ដែលបានផ្តល់ការអនុគ្រោះដល់ប្រជាពលរដ្ឋដែលទទួលផលប៉ះពាល់ដោយសារទឹកជំនន់ ដើម្បីសម្រួលដល់ការលំបាករបស់ប្អូនប្រជាពលរដ្ឋ។
ថ្លែងឱកាសអញ្ជើញប្តូរព័ត៌មានថ្ងៃខែឆ្នាំកំណើតក្នុងបញ្ជីឈ្មោះបោះឆ្នោត របស់សម្តេចជោ ដោយប្តូរពីថ្ងៃទី០៤ ខែមេសា ឆ្នាំ១៩៥១ ទៅថ្ងៃទី០៥ ខែសីហា ឆ្នាំ១៩៥២ នៅសង្កាត់តាខ្មៅ ក្រុងតាខ្មៅ ខេត្តកណ្ដាល សម្តេចតេជោ ហ៊ុន សែន បានមានប្រសាសន៍ថ្លែងអំណរគុណ ដល់គ្រឹះស្ថាន មីក្រូហិរញ្ញាវត្ថុ ដែលបានផ្តល់ការអនុគ្រោះដល់ប្រជាពលរដ្ឋដែលទទួលផលប៉ះពាល់ដោយសារទឹកជំនន់ តាមរយៈនៃការពន្យាពេលសម្រាប់ការសង បន្ធូរបន្ថយអត្រាការប្រាក់ ឬតាមរយៈការរៀបចំឥណទានឡើងវិញ ដើម្បីសម្រួលដល់ការលំបាករបស់ប្រជាពលរដ្ឋដែលរងគ្រោះ។
សម្តេចតេជោ ក៏បានអរគុណផងដែរចំពោះ ការដែលមិនទៅរឹបអូសផ្ទះសម្បែងដីធ្លីថែមទៀត តាមកិច្ចសន្យាដើមរបស់ពួកគាត់នោះ ខណៈដែលពួកគាត់កំពុងជួបប្រទះនៅបញ្ហាប្រឈមនេះ។
គួរជម្រាបថា ក្នុងពិធីប្រគល់សញ្ញាបត្រ ជូននិស្សិតនៃសាកលវិទ្យាល័យជាតិគ្រប់គ្រង កាលពីថ្ងៃទី១៧ ខែតុលា ឆ្នាំ២០២២ នាមជ្ឈមណ្ឌលពាណិជ្ជកម្មនិងពិព័រណ៍ជ្រោយចង្វា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍អំពាវនាវដល់គ្រឹះស្ថាន មីក្រូហិរញ្ញាវត្ថុ ដើម្បីផ្តល់ការអនុគ្រោះដល់ប្រជាពលរដ្ឋដែលទទួលផលប៉ះពាល់ដោយសារទឹកជំនន់ តាមរយៈនៃការពន្យាពេលសម្រាប់ការសង បន្ធូរបន្ថយអត្រាការប្រាក់ ឬតាមរយៈការរៀបចំឥណទានឡើងវិញ ដើម្បីជួយសម្រួលការលំបាករបស់ប្រជាពលរដ្ឋដែលកំពុងរងគ្រោះដោយទឹកជំនន់៕
